मोरङ ६ मा मजदुर नेता ओपेन्द्रको सादगी चुनाव प्रचार

विराटनगर । आगामी फागुन २१ गते हुने प्रतिनिधिसभाको निर्वाचनका लागि मोरङ क्षेत्र नम्बर ६ मा चुनावी सरगर्मी बढेको छ। ठूला दलका उम्मेदवारहरू तडकभडक र खर्चिलो प्रचारप्रसारमा होमिएका बेला नेपाल कम्युनिस्ट पार्टीका उम्मेदवार ओपेन्द्र कुमार राय अमात भने ‘सादा जीवन र उच्च विचार’को उदाहरण प्रस्तुत गर्दै चुनावी मैदानमा देखिएका छन्।

नेपाली कांग्रेसका प्रभावशाली नेता डा. शेखर कोइराला र नेकपा (एमाले) का विनोद ढकाल जस्ता ‘हेभिवेट’ उम्मेदवारसँग प्रतिस्पर्धामा रहेका ओपेन्द्रले आफ्नो प्रचार शैलीलाई पूर्णतः सदाचारी र पारदर्शी बनाएका छन्। निर्वाचन आयोगले आचारसंहिता उल्लंघन गर्नेहरूलाई कारबाही गरिरहेका बेला, ओपेन्द्रले भने मोटरसाइकलमा हिँडेरै जनताको घरदैलो पुग्ने र न्यूनतम खर्चमा चुनाव लड्ने प्रतिबद्धता जनाएका छन्।

को हुन् ओपेन्द्र राय?
मोरङको बुढीगंगा गाउँपालिका–५, हात्तीमुढाका ४८ वर्षीय ओपेन्द्र राय एक श्रमजीवी नेता हुन्। उनी र उनको परिवार आज पनि स्थानीय उद्योगहरूमा मजदुरी गरेर जीविका चलाउँछन्। ग्रामिण भेगमा सानो टिनको घरमा बस्ने ओपेन्द्रको जीवनशैली सादा छ। पहाडे मुलकी सावित्रा भण्डारीसँग अन्तर्जातीय विवाह गरेका उनी मधेशी र पहाडी समुदायबीचको भावनात्मक एकताका प्रतीक समेत मानिन्छन्।

२०५३ सालदेखि माओवादी आन्दोलनमा आकर्षित भएका उनी २०५६ सालदेखि सशस्त्र जनयुद्धमा पूर्णकालीन कार्यकर्ताका रूपमा होमिएका थिए। आफ्ना सहकर्मीहरू सत्ता र शक्तिमा पुग्दा पनि उनी विचलित नभई निरन्तर मजदुरकै हकहितमा लडिरहे। हाल उनी अखिल नेपाल ट्रेड युनियन महासंघको केन्द्रीय उपमहासचिव तथा कोशी प्रदेश इन्चार्जको जिम्मेवारीमा छन्।

पारदर्शिता र सुशासन मुख्य एजेन्डा
ओपेन्द्रले आफ्नो चुनावी घोषणापत्रमा ‘चुनावको खर्च पारदर्शी बनाउने र सार्वजनिक गर्ने’ विषयलाई मुख्य नारा बनाएका छन्। उनले अपारदर्शी लगानी र चुनावको मुखमा पैसा बाँड्ने प्रवृत्तिको कडा विरोध गर्दै आएका छन्। “चुनावमा हुने अपारदर्शी खर्च राज्यको दोहन हो,” उनी भन्छन्, “म पदलाई प्रतिष्ठाको पेवा होइन, सेवाको माध्यम बनाउन चाहन्छु।”

त्रिपक्षीय घेरा र ओपेन्द्रको आत्मविश्वास
मोरङ ६ मा कांग्रेसका शेखर कोइराला, एमालेका विनोद ढकाल र राष्ट्रिय स्वतन्त्र पार्टी (रास्वपा) की रुविना आचार्य जस्ता चर्चित उम्मेदवारहरू चुनावी मैदानमा छन्। सबैले आ–आफ्नो प्रचारलाई आक्रामक बनाइरहँदा ओपेन्द्र भने मजदुर र निम्न वर्गका मतदाताहरूको विश्वास जित्ने रणनीतिमा छन्। पहुँचवाला मजदुर नेता भएर पनि आर्थिक अनियमितताबाट टाढै रहेका कारण उनको सादगी र निष्ठा नै जितको मुख्य आधार भएको स्थानीय मतदाताहरूको तर्क छ।

आगामी फागुन २१ को निर्वाचनले ‘पैसा र पहुँच’ कि ‘सादगी र निष्ठा’ लाई रोज्छ, त्यो भने हेर्न बाँकी नै छ। तर, ओपेन्द्र रायको यो भिन्न शैलीले भने मोरङको चुनावी राजनीतिमा नयाँ बहसको सुरुवात गरिदिएको छ।