विराटनगर । कोशी प्रदेशका पूर्वआन्तरिक मामिला तथा कानुनमन्त्री लिलाबल्लभ अधिकारीले आफू जोडिएको मानव बेचबिखन र लिखत किर्ते मुद्दामा आफैँ पीडित भएको बयान दिएर उन्मुक्ति पाएको खुलेको छ ।
जिल्ला सरकारी वकिल कार्यालय काठमाडौँले उनको सोही बयानको आधारमा मुद्दा नचलाउने निर्णय गरिसकेको छ । प्रहरीले भने अधिकारीलाई मुद्दा चलाउनुपर्ने राय दिएको थियो ।
पूर्वमन्त्री अधिकारीसँगै जापान जान १० लाख देखि १३ लाख रुपैयाँसम्म विचौलियालाई बुझाएका खोटाङका दावा शेर्पा र जनक राई तथा रसुवाका कञ्चन देवकोटाविरुद्ध भने मुद्दा दायर गरिएको छ । उनीहरुले बुझाएको पैसामै जापान हिँडेका अधिकारीले भने अदालत नपुग्दै उन्मुक्ति पाएका छन् ।
सरकारी वकिलको कार्यालय काठमाडौंमा पेश गरको अभियोगपत्रमा रहेको अधिकारीको बयान अधिकारी स्वयंले मन्त्रीबाट राजीनमा दिएपछि गरेको पत्रकार सम्मेलनमा दिएको अभिव्यक्तिसँग बाझिएको देखिन्छ ।
पूर्वमन्त्रीसँगै उनीहरू पनि जापानको नारिता विमानस्थलबाट ‘डिपोर्ट’ भएर काठमाडौँ फर्किएका थिए । मन्त्री अधिकारीले भने तीन जना डिपोर्ट भएको भएपनि आफू भने आफैं जापानबाट फर्किएको बयान दिएका छन् । अधिकारीले मन्त्रीबाट राजीनामा दिनु अगाडि आयोजित पत्रकार सम्मेलनमा हङकङ विमानस्थलमै आफूसँग तीन जनाले जापान जान मन्त्रालयकै परिचयपत्र देखाएपछि आफू झसंग भएको बताएका थिए । प्रहरीलाई दिएको बयानमा भने उनले जापानमा पुगेपछि मात्र परिचयपत्र देखाएको बताएका छन् ।
पत्रकार सम्मेलनमा हङकङबाटै फर्किने प्रयास गरेको र नमिलेको कारण जापान पुगेर उनीहरुलाई पनि लिएर फर्किएको अधिकारीले बताएका थिए । तर, काठमाडौं जिल्ला अदालतमा पेश भएको अभियोगपत्रमा उल्लेख भएको आधिकारीको बयानमा भने उनले जापानको विमानस्थलको लाइनमा बसेपछि तीन जनाले परिचयपत्र देखाएको र त्यसपछि त्यहाँको अध्यागमनलाई भनेर नेपाल फर्किएको जिकिर गरेका छन् ।
‘मानव तस्कर तथा किर्ते सम्बन्धी अपराधबारे मौकामै आफूलाई थाहा हुनेबित्तिकै प्रहरीलाई सूचना आफूले दिएको अधिकारीको दावी छ । तर, उनकै भनाई अनुसार हङकङमै त्यसबारे जानकारी पाएका उनले किन जापान पुगेपछि मात्र प्रहरीलाई त्यसको जानकारी दिए भन्ने प्रश्न छ ।
अधिकारीले बयानमा हाल फरार रहेका गोपाल भनिने योगराज गौतमलाई आफ्नो राहदानी दिएको र उनैले भिषा तथा टिकसहितको प्रबन्ध गरिदिएको स्वीकार गरेका छन् । त्यसबाट उनी बिचौलियाको पैसामा जापान जान खोजेको स्पष्ट हुन्छ । तर, सरकारी वकिलको कार्यालयले मानब तस्करीमा संलग्नसँग अधिकारीको सम्पर्क भएको नदेखिएको भन्दै उनलाई उन्मुक्ति दिएको छ ।
प्रहरीले भने जापानमा हुने कार्यक्रममा गएका अधिकारीसहित सबैलाई नारिता विमानस्थलको अध्यागमन कार्यालयले डिपोर्ट गरि एकै प्लेनबाट फिर्ता पठाएको, अधिकारीले बिचौलिया विष्णु भट्टराई, गोपाल भन्ने योगराज गौतम, दिवाकरबाबु भट्टराई र महेश पाण्डेंसमेतसँग मिलेमतो गरी कन्चन देवकोटा, जनक राई र दावा शेर्पालाई अवैध रुपमा नक्कली कागजातहरु बनाई जापानमा ललैजान भनी रकम संकलन गरेको, सोही रकमबाट अधिकारी जापान गएको र पक्राउ परेकाहरुसँग अधिकारी मन्त्री रहेकै मन्त्रालयका नक्कली परिचयपत्र भेटिएको भन्दै अधिकारीमाथि पनि मुद्दा चलाउनुपर्ने राय दिएको थियो । प्रहरी निरीक्षक तेजप्रसाद भट्टराईको प्रतिबेदन अभियोगपत्रमा समावेश छ ।
यस्तो छ अधिकारीको बयानको पूर्णपाठ
लायन्स इनटरनेशनलको कार्यक्रममा बाहेक अन्य कार्यक्रमहरूमा भाग लिन जाँदा आयोजकले नै सबै खर्च बेहोरेका हुँदा जापानमा हुने भनिएको कार्यक्रममा समेत मलाई आयोजकले नै सबै खर्च बेहोर्ने भनी गोपाल भन्ने योगराज गौतमले मलाई भनेकाले म सोही अनुसार जापानमा गएको हुँदा मैले आयोजक कै खर्चमा जाने हो भने हुन्छ भनेको थिएँ । सो कुराकानी भएको केही दिन पछि निज योगराज गौतमले मेरो राहदानी मागेकाले मैले मेरो राहदानी निजलाई दिएको थिएँ । निजले राहदानी लगे पछि को कसलाई दिए र मेरो राहदानीमा जापानको भिसा लागेको भन्ने कुरा मलाई थाहा भएन ।
केही समय अगाडि मलाई मेरो छिमेकी रतुवामाई नगरपलालिका स्थायी घर भएका मेरो पुरानो साथी गोपाल भन्ने योगराज गौतमले मलाई फोन गरी जापानमा एउटा राम्रो कार्यक्रम आयोजना हुँदै छ आयोजककै खर्चमा जाने गरी पठाई दिन्छु भनेकाले म यस भन्दा अगाडि पनि World Youth Federation को आयोजनामा दक्षिण अफ्रिकाको जोहनेसवर्गमा भएको विश्व युवा सम्मेलनमा भाग लिई सकेको छु यस्तै गरी World Peace Counsil को आयोजनामा फिलिपिन्स, श्रीलंका समेतमा भएको कार्यक्रममा भाग लिई सकेको छु । त्यस्तै गरी Internation Democretic Lawers Assiciation को आयोजनमा बेल्जियमको राजधानी व्रसेल्समा भएको सम्मेलन तथा अमेरिकाको लसभेगासमा लायन्स इनटरनेशनलको कार्यक्रममा समेत भाग लिई सकेको छु ।
मिति २०८१/०७/१० गते मलाई योगराज गौतमले फोन गरी तपाईँको जापानको फ्लाइट भोलि राति २१;०० बजेको समयमा छ टिकेट मैले हिजो नै ह्वाट्सएमबाट पठाई दिएको छु भनी खबर गरेकाले मैले निजलाई कार्यक्रम सम्बन्धी सम्पूर्ण कागजातहरू पठाई दिनु भन्दा निज हुन्छ, हुन्छ भन्दै आलटाल गरी बसे तर पठाएनन् । मिति २०८१/०७/११ गते अं. १७:०० बजेको समयमा मेरो भिसा लागेको राहदानी, प्लेनको टिकेट र कार्यक्रमको सम्पूर्ण कागजातहरू समेत मलाई योगराज गौतमसँग आएका महेश पाण्डेले त्रिभुवन अन्तर्राष्ट्रिय विमानस्थलको नयाँ टर्मिनल भवनको बाहिर रहेको कान्तिपुर क्याफेमा भेट गरी दिएका हुन् ।
सोही समयमा मात्र मैले महेश पाण्डे भन्ने व्यक्तिलाई देखेको र भेटेको हुँ । सोही वेलामा मेरो अङ्गरक्षकलाई खिच्न लगाएको थिएँ सो फोटो पनि मैले प्रहरीलाई तत्कालै पठाई सकेको छु । निज महेश पाण्डेले मलाई सबै कागजातहरू यसैमा छ हेर्नु भनी दिए पछि मैले ती कागजातहरू आफ्नो झोलामा राखी अन्तर्राष्ट्रिय विमानस्थल भित्र प्रवेश गरी जापानको लागि क्याथे पेसीफिक विमानबाट जापानतर्फ प्रस्थान गरेको हुँ ।
जापानको लागि फ्लाइटबाट हिँडेपछि हङकङमा ट्रान्जिट परेकोले म सोही ट्रान्जिटमा बसिरहेको समयमा मलाई हाल पक्राउ परेका कन्चन देवकोटा, जनक राई र दावा शेर्पा समेत मलाई भेटन आई हामीहरु समेत हजुरसँगै सोही कार्यक्रममा जानको लागि हिँडेको हो भनेपछि मलाई शङ्का लागि हङकङबाट जापानको लागि हिँडेपछि नारिता विमानस्थलमा झरी इमिग्रेसनमा लाइनमा बसिरहेको अवस्थामा कन्चन देवकोटा, जनक राई र दावा शेर्पा समेतले हामीहरूलाई समेत सँगै लानु भन्दा मैले निजहरूलाई म तपाईँहरूलाई चिन्दिन म एक्लै आएको हुँ भन्दा निजहरूले कसरी चिन्नु हुन्न ? हामी तपाईँकै कर्मचारी हौँ भनी जनक राईले म मन्त्री रहेको आन्तरिक मामिला तथा कानुन मन्त्रालयको कर्मचारी परिचय पत्र समेत देखाए पछि मैले सोही परिचय पत्र तत्कालै आफ्नो हातको हत्केलामा राखी मोबाइलबाट फोटो खिचे पछि प्रस्ट रूपमा थाहा भयो कि मलाई निमित्त कार्यालय प्रमुखको रूपमा उल्लेख गरी किर्ते परिचय पत्र बनाएको देखिएबाट यिनीहरूले मेरो सही छाप किर्ते गरी म तत्काल कार्यरत रहेको आन्तरिक मामिला तथा कानुन मन्त्रालयको नक्कली कार्ड प्रयोग गरेका रहेछन् ।
मेरो मन्त्रालयको मेरो सही छाप समेत किर्ते गरी परिचय पत्र समेत बनाएको थाहा पाए पछि यस सम्बन्धी सम्पूर्ण सूचनाहरू जापानको नारिता विमानस्थलबाटै कोशी प्रदेश प्रहरी प्रमुख तथा प्रहरी नायव महानिरीक्षक राजन अधिकारीलाई ह्वाट्सएप मार्फत मेरो सही छाप किर्ते गरी बनाएको कर्मचारी परिचय पत्रको फोटो, कार्यक्रमको सम्पूर्ण कागजातहरू अपराध अनुसन्धानका लागि मैले पठाएको हुँ र म नारिता विमानस्थलबाटै मलाई फिर्ता गरिदिनु म कार्यक्रममा जान्न भनी फिर्ता आएको हुँ । यसरी मानव तस्कर तथा किर्ते सम्वन्धी अपराध वारे मौकामै आफूलाई थाहा हुने बित्तिकै प्रहरीलाई सूचना गर्ने व्यक्ति म हुँ । म यस अपराध घटनाको पीडित र अपराधको पहिलो सूचक समेत भएको हुँदा म अपराधमा संलग्न व्यक्ति होइन । मसँग हङकङमा भेट भएका कन्चन देवकोटा, जनक राई र दावा शेर्पालाई मेरै सुचनाको आधारमा प्रहरीले पक्राउ गरी अनुसन्धान समेत भइरहेको छ ।
मेरो हैसियत भनेको अपराधको सूचना दिने सरकारी गवाह हो मेरो र मेरो मन्त्रालयको सही छाप र परिचय पत्र किर्ते गरी बनाएको हुँदा म आफैँ पीडित हुँ दोषी माथि कारबाही गरी मैले न्याय पाउँ। जनक राई र कन्चन देवकोटाको नाममा कोशी प्रदेश सरकार लेखिएको आन्तरिक मामिला तथा कानुन मन्त्रालय विराटनगर लेखिएको कर्मचारी परिचय पत्रको डिजिटल कार्डहरू म सोही मन्त्रालयको मन्त्री भएको हुँदा ती कार्डहरू किर्ते गरी बनाएका नक्कली कार्डहरू हुन । जनक राई र कन्चन देवकोटा कोशी प्रदेश सरकार लेखिएको आन्तरिक मामिला तथा कानुन मन्त्रालय विराटनगरका कर्मचारीहरू होइनन् । निजहरूको नाममा वनेको कर्मचारी परिचय पत्रको डिजिटल कार्डमा मेरो नाम लेखि सही समेत गरेको सही छाप मेरो होइन । मेरो सही छाप समेत किर्ते गरेको हो । जापानमा हुने कार्यक्रममा सहभागी हुनको लागि म नेपालबाट उड्नु भन्दा केही समय अगाडि मात्र महेश पाण्डेले मलाई मेरो भिसा लागेको राहदानी, प्लेनको टिकेट र कार्यक्रमको कागजातहरू दिएकाले मैले सबै कागजातहरू हेर्न भ्याएको थिएन ।
के कसरी, को कसले कन्चन देवकोटाको नाममा एउटै होटल बुक को कसले गरेका हुन् मलाई थाहा भएन म नेपालबाट जापानमा हुने कार्यक्रममा भाग लिन जाँदा एक्लै गएको र सो कार्यक्रममा म जानु भन्दा अगाडि कन्चन देवकोटा समेतका प्रतिवादीहरु म सँग नै जापानमा जाँदैछन् भन्ने कुराको जानकारी मलाई थिएन । कन्चन देवकोटा, जनक राई र दावा शेर्पालाई मैले हङकङमा मात्र भेटेको हुँदा निजहरूलाई म चिन्दिन । निजहरूलाई को कसले के कति रकम लिई जापानमा पठाएका हुन मलाई थाहा भएन । निजहरूबाट मैले कुनै पनि रकम लिएको छैन । जापानमा हुने International conference on open access to Culture 2024 को ७ दिनको कार्यक्रममा सहभागी गराउने आयोजकहरू को हुन मलाई थाहा भएन । आयोजकसँग मेरो सम्पर्क चिनजान समेत छैन । गोपाल भन्ने योगराज गौतम मेरो छिमेकी नगरपालिकाका स्थानीय बासिन्दा र मेरो पुरानो साथी भएकाले राम्रोसँग चिन्दछु ।
महेश पाण्डेलाई मैले मिति २०८१/०७/११ गते मात्र भेटेको हुँ । कन्चन देवकोटा, जनक राई र दावा शेर्पालाई म चिन्दिन । निजहरूलाई को कसले जापान पठाएका हुन मलाई थाहा छैन । मलाई जापानमा कार्यक्रम हुँदैछ आयोजकले खर्च बेहोर्छन् जाने ? भनी मलाई योगराज गौतमले सोधेकाले मैले हुन्छ भनेपछि निजले मेरो राहदानी समेत लगी को कसलाई भनी भिसा लगाएका हुन मलाई थाहा भएन । म जापान उड्ने दिनमा मात्र मलाई महेश पाण्डे भन्ने व्यक्तिले भिसा लागेको राहदानी समेतका कागजातहरू दिएको भन्ने कुरा मैले माथि नै बयानको क्रममा खुलाई लेखाई सकेको छु । मैले कन्चन देवकोटा, दावा शेर्पा, जनक राईलाई चिन्दिनँ ।
निजहरूलाई को कसले जापान पठाएका हुन् मलाई थाहा भएन । म हङकङको ट्रान्जिटमा रहेको अवस्थामा निजहरूले मलाई नमस्कार भन्दै आए मलाई कसरी चिन्नु भयो ? भनी सोध्दा निजहरूले हामीहरूलाई कसैले फोटो पठाएको थियो सोही फोटो मार्फत चिनेका हौँ भनेकाले निजहरूसँग मेरो हङकङमा भेटघाट हुनु एक संयोग मात्र हो । निजहरूसँग मेरो सो भन्दा अगाडि चिनजान, सम्पर्क, भेटघाट केही थिएन र छैन । निजहरूले साथमा बोकेको कर्मचारी परिचय पत्र नक्कली भन्ने कुरा मैले थाहा पाउने बित्तिकै यिनीहरूले मलाई नियोजित ढंगले प्रयोग गरेको कुरा थाहा पाउना साथ तत्कालै मैले आफू जापानको कार्यक्रममा भाग लिन जान्न भनी नारिता बिमानस्थलबाटै फिर्ता भई किर्ते गरी परिचय पत्र बनाइ तस्करी भएको सम्बन्धमा मैले तत्कालै प्रहरीलाई जानकारी गराई अपराधमा संलग्न मानिसहरूलाई पक्राउ गर्न सहयोग गरेको हुँ ।
बरामदी मुचुल्कामा उल्लेख गरिएको बरामदी सामानहरू लिलाबल्लभ अधिकारीको नाममा जारी भएको 0858**** र 520**** नम्बरको नेपाली राहदानी थान २, IMEI No 350411****** र 350559872****** भएको ९८५२०***** र ९८१७३***** नम्बरको सिम प्रयोग गरिएको Model name: SM S711B/DS भएको Galaxy S23FE मोबाइल फोन थान १ र लिला बल्लभ अधिकारीको नाममा जारी भएको नेपाली नागरिकताको छाँया प्रति थान १ मेरो घर कोठाबाट बरामद भएका मेरो नामको राहदानी, नागरिकता र मैले प्रयोग गर्ने मोबाइलहरू हुन भन्ने ब्यहोरा प्रतिवादी लिला वल्लभ अधिकारीको बयान ।
