विराटनगर । विभिन्न कारणले रिक्त रहेका कोशी प्रदेशको विभिन्न पालिकाको आठ पदहरुको उपनिर्वाचनको आन्तरिक तयारीमा दलहरु जुटेका छन् । मुख्य प्रतिस्पर्धी रहेका दलहरु नेपाली कांग्रेस, एमाले र माओवादीले उम्मेदवार छनौट गर्दै चुनावी प्रचारमा जुटेको जनाएका छन् ।
२०८४ सालको निर्वाचनमा एक्लाएक्लै प्रतिस्पर्धा गर्ने र कसैले कसैसँग गठबन्धन नगर्ने घोषणा गरेका तीन दलले यस उपनिर्वाचनलाई प्रतिष्ठाको विषय बनाएका छन् । कोशी प्रदेशमा एक पालिका अध्यक्ष, एक जिल्ला समन्वय समिति प्रमुख र सात जना वडाध्यक्ष पदका लागि प्रतिस्पर्धा हुँदैछ ।
नेकपा एमालेका कोशी प्रदेश अध्यक्ष घनश्याम खतिवडाले प्रदेश समितिले उम्मेदवार छनौट गरेर केन्द्रमा पठाइसकेको जानकारी दिए । ‘अहिलेसम्म हामीले उम्मेदवार सिफारिस गरेर माथि पठाइसकेका छौं । विभिन्न ठाउँका पाँच जना वडाध्यक्षको उम्मेदवार निर्विरोध छनोट भइसकेको छ,’ खतिवडाले भने, ‘ग्रामथानमा गाउँपालिकाको अध्यक्षमा चार जनाको प्रतिस्पर्धा देखिन्छ । तुलसी विश्वासको नाममा धेरै चर्चा परिचर्चा भएको देखिरहेको छु ।’
उनले एमालेले निर्वाचन प्रचार समिति बनाइसकेका पनि बताए । ‘अब उम्मेद्वार टुंगो लागिसकेपछि थप निर्णय हुन्छ । जम्मा ८ ठाउँमै प्रदेश समितिको तर्फबाट प्रतिनिधिहरु पठाउँछौं । सम्बन्धित जिल्ला समितिले पनि हेर्छ,’ उनले भने ।
नेपाली कांग्रेस कोशी प्रदेशका महामन्त्री भुपेन्द्र राईले उपनिर्वाचनमा उम्मेदवारहरु लगभग टुंगिसकेको बताए । ‘अध्यक्ष, उपाध्यक्षहरूको टिकट जिल्ला समितिले बाँड्छ । जिसस सभापतिको प्रदेशले बाँड्ने हो । त्यो पनि हामी २७, २८ गतेसम्ममा टुंगो लगाउँछौं । सबै वडाको पनि टुंगो लागिसकेको छ,’ उनले भने, ‘चुनावी अभियानका लागि केन्द्रले सहमहामन्त्री भिष्मराज आङ्देम्बेलाई जिम्मेवारी दिएर प्रदेश पठाएको छ । उहाँको उपस्थितिमा प्रदेश समितिको बैठक बसेर थप जिम्मेवारी तोक्छौं ।’
उता, नेकपा माओवादीका कोशी प्रदेश अध्यक्ष हर्कबहादुर नेम्वाङ (मिक्सो)ले पनि पार्टीलेसबै उम्मेद्वारको टुंगो आइतबारसम्ममा लगाउने बताए । ‘अनौपचारिक हिसावले टुंगो लागिसक्यो । पार्टी कमिटीले निर्णय गरेपछि औपचारिक घोषणा हुन्छ,’ उनले भने । चुनावी कमाण्डको जिम्मा जिल्ला समन्वय समिति र पालिका समितिलाई नै दिएको उनले बताए ।
कोशी प्रदेशमा सबैभन्दा बढी चर्चामा रहेको उपचुनाव मोरङको ग्रामथान गाउँपालिकाको अध्यक्ष पदको हो । उक्त पालिकाको लागि माओवादीले नमोनारायण माझीलाई उम्मेद्वार बनाएको छ भने नेपाली कांग्रेसले बलराम सरदारलाई उम्मेदवार बनाउने निर्णय गरिसकेको छ । एमालेले भने तीन जनाको नाम केन्द्रमा सिफारिस गरेको भएपनि तुलसी विश्वासलाई उम्मेदवार बनाउने सम्भावना रहेको प्रदेश अध्यक्ष खतिवडाले नै संकेत गरेका छन् ।
कहाँ–कहाँ हुँदैछ उपचुनाव ?
कोशी प्रदेशमा मोरङको ग्रामथान गाउँपालिकामा अध्यक्ष पदका लागि निर्वाचन हुँदैछ । सो पालिकाका अध्यक्ष जयप्रकाश गच्छदारको मृत्यु भएपछि खाली रहेको पदमा निर्वाचन हुन लागेको हो । गच्छदार नेपाली कांग्रेसका तर्फबाट अध्यक्षमा विजयी भएका थिए । यसैगरी झापाको कन्काई नगरपालिका–६ मा वडाध्यक्षका लागि उपनिर्वाचन हुँदैछ । सो वडामा एमालेबाट दीर्घबहादुर थापा अध्यक्षमा निर्वाचित भएका थिए ।
यस्तै तेह्रथुमको लालीगुराँस नगरपालिका–८ वडामा पनि उपनिर्वाचन हुँदैछ । सो वडामा काङ्ग्रेसबाट तेजमान लिम्बू अध्यक्ष निर्वाचित भएका थिए । सुनसरीको गढी गाउँपालिका– ६ मा एमालेबाट निर्वाचित वडाध्यक्ष सदानन्द उराउ झाँगरको मृत्यु भएपछि उपनिर्वाचन हुने भएको हो ।
यस्तै ओखलढुङ्गाको मोलुङ गाउँपालिका–५ वडामा पनि उपनिर्वाचन हुँदैछ । सो वडामा कांग्रेसबाट वडाध्यक्षमा गोपीकृष्ण कार्की निर्वाचित भएका थिए । उनको निधन भएपछि उपनिर्वाचन हुँदैछ ।
उदयपुरको त्रियुगा नगरपालिका– १२ मा कांग्रेसबाट निर्वाचित वडाध्यक्ष चुडाराज काफ्लेको निधन भएपछि उपनिर्वाचन हुँदैछ । उदयपुरकै बेलका नगरपालिका–९ मा पनि उपनिर्वाचन हुँदैछ । सो वडामा कांग्रेसबाट निर्वाचित अध्यक्ष पदमबहादुर खड्काको निधन भएको थियो ।
कोशी प्रदेश निर्वाचन कार्यालय विराटनगरले रिक्त भएका पदमा उपनिर्वाचनको तयारी भइरहेको जनाएको छ । ताप्लेजुङको सिरिजङ्गा गाउँपालिका वडा नम्बर ३ मा कांग्रेसबाट निर्वाचित वडाध्यक्ष दिलप्रसाद बोखिम हङकङ गएपछि त्यहाँ पनि उपनिर्वाचन हुँदैछ । एक वर्षअघि हङकङ गएका बोखिमले उतैबाट राजीनामा पठाएपछि उपनिर्वाचन हुन लागेको हो ।
यसैगरी जिल्ला समन्वय समिति ओखलढुङ्गाको रिक्त रहेको प्रमुखका लागि समेत मंसिर १६ मै निर्वाचन हुँदैछ । नेपाली कांग्रेसबाट समन्वय समितिको प्रमुख निर्वाचित डिल्लीराम खनालको गत वर्ष असोजमा निधन भएको थियो ।
रिक्त रहेका पदमा हुने उपनिर्वाचनका लागि मंसिर २ गते मनोनयन दर्ता गर्ने कार्यतालिका रहेको छ । निर्वाचन हुने स्थानीय तहहरूका लागि कात्तिक ३० मा निर्वाचन अधिकृतको कार्यालय स्थापना हुने निर्वाचन आयोगको तालिका रहेको छ ।
