विराटनगर । ताप्लेजुङको फक्ताङलुङ गाउँपालिकामा बिहीबार रातिको वर्षापछि झरेको पहिरोले पुरिएर गाउँपालिकाका उपाध्यक्ष रविन साम्रा लिम्बुको घर बगाउँदा उनको परिवारका चार जनाको मृत्यु भएको छ ।
मृत्यु हुनेमा उपाध्यक्ष लिम्बूका बाबु ७१ वर्षीय रामबहादुर साम्रा लिम्बु, आमा ४८ वर्षीय जसमाया साम्रा र जुम्ल्याहा बहिनीहरु १२ वर्षीया गंगा र जमुना साम्रा लिम्बु रहेको गाउँपालिका अध्यक्ष राजन लिम्बुले जानकारी दिए । मध्यराति करिब २ बजेको समयमा आएको पहिरोले घर बगाएको थियो ।
पहिरोमा परी साम्रा परिवारकै २ जना घाइते भएका छन् । फक्ताङलुङ गाउँपालिका–२ खेजेनिम टिन्जामा गएको पहिरोमा चार जनाको मृत्यु भएको जिल्ला प्रहरी कार्यालय ताप्लेजुङका प्रमुख डीएसपी रवि रावलले जानकारी दिए । सिंवा प्रहरी चौकी र मित्लुङ हाइड्रोपावरमा रहेको खटिएको नेपाली सेनाको टोलीसहित स्थानीयले पहिरोबाट शव निकालेको छ ।
त्यस्तै खेजेनिम मावि छेउमा गएको अर्को पहिरोमा परी ४० वर्षीय युगेन साम्रा र उनका तीन वर्षीया छोरी घाइते भएको नेपाल रेडक्रस सोसाइटी ताप्लेजुङले जनाएको छ । रेडक्रस सभापति इन्द्र गुरुङका अनुसार पहिरोले युगेनको घरमा क्षति पुर्याएको छ ।
जिल्ला प्रहरी कार्यालयबाट प्रहरी निरीक्षक कमल लुंगेलीको थप टोली पहिरो गएको क्षेत्रमा परिचालन गरिएको डीएसपी रावलले जानकारी दिए । अहिले सदरमुकाम फुङलिङसहित जिल्लाका धेरै ठाउामा वर्षा भइरहेको छ ।
यअसघ सिसेवा र सिस्ने खोलामा आएको बाढीले बिहीबार चारवटा अस्थायी पुल तथा उत्तरतर्फ जोड्ने सडक अवरुद्ध बनाएको थियो ।
