विराटनगर । मोरङ प्रहरीले ३ जनालाई हतियारसहित पक्राउ गरेको छ । शुक्रबार राती मोरङको धनपालथान गाउँपालिका–२ पैठा स्थित कर्सियाको भित्री सडक खण्डमा पार्किङ गरी राखेको स्कारपियोमा प्रहरीले हतियार फेला पारेको थियो ।
बिआर ०६ पिए १३६२ नम्बरको सेतो रंगको स्कारपियो गाडी चेकजाँच गर्ने क्रममा गाडीको ड्यासबोर्ड भित्र लुकाई छिपाई कालो कपडामा बेरी राखेको कटुवा पेस्टोल १ थान र सोको ३ राण्ड गोली बरामद भएको थियो ।
प्रहरीले स्कारपियो चालक सर्लाही हरिपूर्वा नगरपालिका ७ का २७ वर्षीय रविन्द्र कुमार यादवलाई शुक्रबार नै नियन्त्रणमा लिएको हो । यस्तै सो गाडीमा सवार सोही ठाउँका २० वर्षीय कमलेश कुमार यादव र महोत्तरी गौसलाका २२ वर्षीय राम दयाल यादवलाई शनिबार प्रहरीले पक्राउ गरेको हो । पक्राउ परेका उनीरुहको विषयमा थप अनुसन्धान भइरहेको प्रहरीले जनाएको छ ।
