विराटनगर । नेपाल कम्युनिस्ट पार्टी (माओवादी केन्द्र)ले आगामी पुस ३ गतेभित्र पदाधिकारी चयन गरिसक्न प्रदेश समितिलाई निर्देशन दिएको छ । मङ्सिर २५ गते उद्घाटन गरिएको १० प्रदेशका सम्मेलनले कार्यसमिति निर्वाचित गरेपनि केही प्रदेशमा पदाधिकारी निर्वाचित गर्न सकेको छैन । राष्ट्रिय सम्मेलनको तयारीमा जुट्नु पर्ने भएकोले माओवादी केन्द्रले पुस ३ गतेभित्र सबै प्रदेश कमिटीले पदाधिकारी निर्वाचित गरिसक्न निर्देशन दिएको हो ।
माओवादीले आगामी पुस ११ देखि १३ गतेसम्म काठमाडौँमा राष्ट्रिय सम्मेलनको आयोजना गर्न लागेको छ । त्यसअघि नै प्रदेशका पदाधिकारी टुङ्गो लगाउन निर्देशन दिइएको हो । स्थायी समिति सदस्य हरिबोल गजुरेलले भभने ‘प्रदेश २ ले समय मागेका कारणले पनि ढिलाइ हुन पुगेको हो । पुस ३ गतेसम्म सम्पन्न हुनेछ ।’
माओवादी केन्द्रका सात भौगोलिक र दुई गैरभौगोलिक प्रदेश समिति गरी नौमध्ये छ वटामा अध्यक्षसहित पदाधिकारीमा विवाद हुँदा टुङ्गो लागेको छैन । माओवादी केन्द्रको केन्द्रीय निर्वाचन आयोगका सदस्य विष्णुपुकार श्रेष्ठका अनुसार प्रदेश १, बागमती, सुदूरपश्चिम र लुम्बिनी प्रदेशमा प्रदेश कार्यसमिति मात्र निर्वाचित भएको छ । पदाधिकारी चयन भएको छैन । प्रदेश २ मा सम्मेलन उद्घाटन भए पनि बन्द सत्र सुरु नै भएको छैन ।
गण्डकी, कर्णाली र सम्पर्क समन्वय विषेश प्रदेश समितिले प्रदेशमा अध्यक्ष टुङ्गो लागेको छ । अन्य पदाधिकारी टुङ्गिएको छैन । गण्डकीमा गायत्री गुरुङ, कर्णालीमा विमला केसी र सम्पर्क समन्वयमा श्रीकृष्ण अधिकारी अध्यक्ष चुनिएका छन् । अन्य पदाधिकारी चयन बाँकी नै छ । उपत्यका विशेष प्रदेश समितिले मात्रै अध्यक्ष जगत सिम्खडासहित पदाधिकारी र कार्यसमिति चयन गरेको छ ।
प्रदेश–१ को अध्यक्षमा सुरेशकुमार राई, हेमराज भण्डारी र इन्द्र आङ्बोहाङले दाबी गरेपछि सर्वसम्मत हुन सकेको थिएन । बुधबार बसेको प्रदेश १ कमिटीको बैठकमा तीनै दाबेदारले दाबी छोडेपछि दोश्रो तहका पाँच जना नेताहरुले अध्यक्ष पदमा दाबी गरेका छन् ।
बागमती प्रदेशमा अध्यक्षका लागि प्रदेश समितिमा रहेका सरल सहयात्री पौडेल, दीनानाथ गौतम र डीपी ढकाल, विदुर खड्काले दाबी गरेका छन् । अध्यक्षमा सर्वसम्मत नभएमा निर्वाचित प्रदेश समितिबाट मतदान गरेर टुङ्गो लगाउनुपर्ने व्यवस्था छ । लुम्बिनीमा अध्यक्षका लागि केन्द्रीय सदस्य हेमराज शर्मा ‘डाइमन’ र दीपेन्द्र पुनः ‘सिजल’ले दाबी गर्नुभएको छ । सुदूरपश्चिम प्रदेश अध्यक्षमा हरिराम चौधरी र नरेन्द्र कुँवरको दाबी रहेको बताइएको छ ।
