विराटनगर । प्रदेश १ की उपसभामुख सरस्वती पोखरेललाई मातृ शोक परेको छ । पोखरेलकी आमा ६९ वर्षीया ओमकला पोखरेलको आज बिहान काठमाडौंस्थित मेडिसिटी हस्पिटलमा निधन भएको हो ।
५२ दिनअघि पोखरेलको बुबा नारायण पोखरेलको पनि घरको छतबाटै लडेर निधन भएको थियो । पोखरेलकी आमा ओमकलालाई कोभिड विरुद्धको खोप लगाएपछि टाउको दुख्न सुरु भएको थियो । त्यसपछि निरन्तर बिरामी पर्नुभएकी उहाँको आज बिहान साढे ६ बजे मृत्यु भएको हो ।
पोखरेलका जेठो छोरा गणेश, माइलो छोरा दिनामणि र कान्छोछोरा देवीराम पोखरेल हुन् । उपसभामुख सरस्वती पोखरेल जेठी छोरी हुन् भने कान्छी विष्णु पोखरेल हुन् । मृतक पोखरेलको आजै पशुपति आर्यघाटमा हिन्दू संस्कार अनुसार दाहसंस्कार गरिने पारिवारिक स्रोतले जनाएको छ । उपसभामुख पोखरेल हिंजै काठमाडौं पुगेकी थिइन् ।
