विराटनगर । नेकपा एमाले मोरङले जिल्लाका १५८ वडामा शुक्रबार वडा अधिवेशनको तयारी पुरा भएको जनाएको छ । सुनवर्षी नगरपालिका ६ मा बाहेक जिल्लाका सबै वडामा शनिबार अधिवेशन हुने मोरङ अध्यक्ष ऋषिकेश पोखरेलले जानकारी दिए ।
शनिबार हुने वडा अधिवेशनबाट पार्टीका वडा कमिटीहरु निर्वाचित हुनेछन् भने पालिका अधिवेशनका लागि प्रतिनिधिहरु पनि छानिने छन् । नेकपा एमालेले कात्तिक ९ गते पालिकाहरुको अधिवेशन सम्पन्न गर्दैछ ।
मोरङका १७ स्थानीय तह र त्यस अन्तरगतका १५९ वटा वडाहरुमा २५ हजार पार्टी सदस्य रहेको र वडा अधिवेशनहरुमा सबै पार्टी सदस्यहरु प्रत्यक्ष सहभागी भएर कमिटीहरु निर्वाचित गर्ने अध्यक्ष पोखरेलले बताए । सुनसवर्षी नगरपालिका ६ बाढीबाट बढी प्रभावित भएकोले केही दिनपछि वडा सम्मेलन हुने पोखरेलले जानकारी दिए ।
नेकपा एमालेले पार्टी सदस्य न्यून भएका पालिकाका वडाहरुमा पाँच जना बराबर एकजना र बढी सदस्य भएका पालिकामा १० जना बराबर एक जना पालिका प्रतिनिधि निर्वाचित गर्ने अध्यक्ष पोखरेलले जानकारी दिए । यस्तै महिला, दलित, अल्पसंख्यक लगायत समावेशी प्रतिनिधित्वका लागि तीन जना बराबर एक जना प्रतिनिधि निर्वाचित गर्ने व्यवस्था रहेको उनले बताए ।
यसैगरी गाउँ तथा नगरपालिकाका वडाहरुमा बढीमा ३१ सदस्यीय र महानगरका वडामा बढीमा ५१ सदस्यीय कमिटी गठन हुने उनले बताए ।
