विराटनगर । गायक कुमार दवाडीले ‘नबोली जित्छौ तिमी’ बोलको गीतको म्युजिक भिडियो बिहीबार युट्युबमा सार्वजनिक गरेका छन्।
होम न्यौपानेको शब्द र दिपक भट्टराईको संगीत रहेको गीतको भिडियोमा संचारकर्मी नरेश भट्टराई र करुणा श्रेष्ठले प्रेमजोडीको अभिनय गरेका छन्।
गीतकार र संगीतकारद्वयको सहकार्यमा यसअघि पनि विभिन्न गीत बजारमा आइसकेका छन्। काठमाडौंमा बसेर संगीत कर्ममा रमाइरहेका दवाडीले छिट्टै आफ्नो एकल गायनको एल्बम निकाल्ने तयारी गरिरहेका छन्।
गीतमा अभिनय गरेका संचारकर्मी नरेश भट्टराई भन्छन्, ‘सार्वजनिक गीत लामो समयसम्म दर्शक श्रोताले सम्झन लायक क्लासिकल गीत हो, ट्रेण्डिङमा पर्ने र छिट्टै हराउने गीत होइन पछिसम्म सुन्दा आनन्द आउने गीत भएकोले भिडियोमा काम गरेको हो।’
भिडियोमा सागर प्रधानको छायाँकंन, विकास दाहालको सम्पादन र युवराज वाइवाको निर्देशन रहेको छ। गीत गायकको आफ्नै युट्युब च्यानल ‘कुमार क्रियसन्स’मार्फत सार्वजनिक गरिएको हो।
गायक दवाडी मोरङको रतुवामाइ निवासी हुन् । बाल्यकालदेखि नै गायन क्षेत्रमा रुची राख्ने उनी स्थानीय स्तरमा निक्कै लोकप्रिय कलाकार मानिन्छन् ।
