विराटनगर । नवविवाहित प्रदेश १ का मुख्यमन्त्री शेरधन राई र मोडल जाङ्मु शेर्पाबीचको प्रेममय भिडियो सार्वजनिक भएको छ ।
गत माघ ११ गते विवाह बन्धनमा बाँधिएका यो जोडीको भिडियो युट्युबमा जाङ्मुको एकाउण्टबाट पोष्ट भएको छ । काठमाडौमा विवाह गर्नुभएका मुख्यमन्त्री राईले भोली अर्थात् माघ १६ गते शुक्रबार विराटनगरमा पार्टी दिने कार्यक्रम छ ।
४९ वर्षे राईले २३ वर्षिया मोडल जाङ्मु शेर्पासँग गरेको विवाहलाई लिएर अहिले पनि विभिन्न चर्चा चलिरहेको छ । तर सार्वजनिक भएको भिडियोमा ‘आधुनिक युगमा आफ्नो संस्कृति र भेषभुषालाई झल्काउँदै र नेपाली समाजमा राम्रो सन्देश प्रवाह गर्दै विवाह बन्धनमा बाँधिएका जोडी’ शीर्षक दिइएको छ ।
भिडियोमा मुख्यमन्त्री राई र शेर्पा हँसिलो मुद्रामा विभिन्न पोशाकमा एक अर्कालाई माया गर्दै गरेको देखिन्छ । फूलबारी, भीर पाखा र होटलमा एकले अर्कोलाई औंठी लगाइदिएर अंगालोमा बाँध्दै गर्दा यो जोडीले जातिगत पोशाक लगाएका छन् ।
मुलुककै कान्छो सांसद बनेर राजनीतिमा अगाडि आउनु भएका शेरधन राई मुख्यमन्त्री बनेपछि नै विवाहको चर्चा चुलिएको थियो । उहाँको जीवन संगीनी बन्न आइपुग्नु भएकी शेर्पाको संखुवासभा घर भएपनि हाल हजुरआमासँग काठमाडौंमा बस्दै आउनु भएको छ । उहाँका बाबु–आमा भने अमेरिकामा हुनुहुन्छ । १३ वर्षको उमेरमा ‘मिस किड क्विन नेपाल’ मा भाग लिएकी उहाँले विभिन्न ब्यूटी प्याजेन्टमा सहभागी हुँदै मिस मंगोल नेपालको उपाधि जित्नुभएको थियो ।
