विराटनगर । पछिल्लो २४ घण्टामा प्रदेश १ मा २४० जना कोरोनामुक्त भई डिस्चार्ज भएका छन् । डिस्चार्ज हुने सबै होम आईसोलेसनका रहेका छन् ।
हालसम्म प्रदेशमा कोरोनामुक्त भएर डिस्चार्ज हुनेको संख्या २८ हजार १८० पुगेको छ । प्रदेशमा बुधबार २६ जना कोरोना संक्रमित थपिएका छन् ।
मोरङ र सुनसरीमा ६–६, झापा र धनकुटामा ४–४, खोटाङमा २, ताप्लेजुङमा १ र प्रदेश १ बाहिरका ३ जना रहेको सामाजिक विकास मन्त्रालयले जनाएको छ । मोरङको विराटनगरमा २, सुन्दरहरैचा, कानेपोखरी, पथरीशनिश्चरे र बुढीगंगामा १–१, सुनसरीको धरानमा ३, इटहरीमा २ र रामधुनीमा १, झापाको कनकाईमा २, कमल गाउँपालिका र स्थानीय तह नखुलेका १–१, धनकुटाको धनकुटा नगरपालिकामा ४, खोटाङको खोटेहाङ र स्थानीय तह नखुलेका १–१, ताप्लेजुङको सिदिङ्वामा १ र प्रदेश १ बाहिरका ३ जनाको रिपोर्ट पोजेटिभ आएको हो ।
प्रदेशमा हालसम्म संक्रमित हुनेको संख्या २९ हजार ७५५ पुगेको छ । प्रदेशमा बुधबार ३१७ जनाको पीसीआर परीक्षण गरिएको थियो । परीक्षण गरिएकामध्ये ११ महिला र १५ पुरुषको रिपोर्ट पोजेटिभ आएको छ ।
हालसम्म २ लाख ८ हजार ४७५ जनाको पीसीआर परीक्षण गरिएको मन्त्रालयले जनाएको छ ।
