इटहरा । मोरङको रतुवामाई नगरपालिका वडा नम्बर १० का अति विपन्न २४ घरपरिवारई आरम्भ नाट्य डबली कला साहित्य मञ्चले राहत वितरण गरेको छ ।
आरम्भले घरघरमा पुगेर वास्तविक विपन्नहरुको तथ्याङ्क संकलन गरी राहत वितरण गरेको संस्थाका सल्लाहकार रामु घिमिरेले जानकारी दिनुभयो ।
विभिन्न सहयोगी दाताहरुको सहयोगमा राहत वितरण गर्दै आइरहेको संस्थाले बिहिबार रतुवामाई १० निवासी पदमबहादुर बस्नेत र धनमाया बस्नेतको छोरा डम्बर बस्नेतको आर्थिक सहयोगमा राहत वितरण गरेको संस्थाका अध्यक्ष समिर सुवेदीले जानकारी दिनुभयो ।
प्रदेशमा दुख गरेर भए पनि आफ्नो गाँउठाँउका गरिब दुखीलाई राहत बाड्न आफ्नो छोराले सहयोग गरेकोमा निकै खुसी महशुस भएको पदमबहादुर बस्नेतले बताउनुभयो । छोराको यो कामबाट आफू निकै खुसी भएको सुनाउँदै उहाँले भन्नुभयो, “मेरो छोराले जस्तै अन्य विदेशिएका नेपालीहरुले अलिअलि भए पनि सहयोग गरे कोही भोकै बस्नु पर्दैन थियो । ”
विश्वभर फैलिएको कोरोना भाईरसको महामारीका कारण देशमा लकडाउनको स्थिति आएदेखि नै रोजीरोटी गुमाएकाहरुलाई आरम्भले सहयोग गर्दै आएको स्मरण गराउँदै अध्यक्ष सुवेदीले भन्नुभयो, जस्तोसुकै अवस्था आएपनि आफ्ना क्षेत्रका मानिसहरुलाई भोकै बस्न दिने छैनौँ । राहत वितरणमा लागिरहने छौँ ।
सामाजिक दुरी कायम गरी बस्नु बाहेकको विकल्प नभएकोे वर्तमान परिवेशमा नगरपालिकाले एक चरणको राहत वितरण गरेपनि पुन राहत वितरण गर्न नसक्दा सर्वसाधारण जनता मर्कामा परेका १० नम्बर वडा अध्यक्ष टंक ढकालले बताउनुभयो । नगरपालिकाले राहतमा ध्यान नदिइरहेकको अवस्थामा आरम्भले गरेको यो कार्य तारिफ योग्य भएको पनि वडा अध्यक्ष ढकालले बताउनुभयो ।
दैनिक ज्यालादारी गरी आफ्नो गुजरा चलाउँदै आइरहेका रतुवामाई १० मंगलबारेका बिरबहादुर भुजेलले बिहान बेलुकीको छाक टार्न नसक्ने अवस्थामा आरम्भले रहात वितरण गरेर आफूहरुको ज्यान बचाइदिएको बताउनुभयो ।
सोही ठाँउकी द्रौपती राजवंशीको पनि विरबहादुरकै जस्तो दहनीय अवस्था थियो । आरम्भले आफ्नो निभ्न लागेको चुलो बालिदियो द्रौपतीले भनिन्, स्थानीय सरकारले वास्ता नगरिरहेको बेला आरम्भ हाम्रा लागि भगवान बनेर आयो ।
आरम्भले २४ घरपरिवारलाई प्रतिघर २० किलो चामल, एक किलो दाल, एक पोका नुन, एक पोका तेल, एक पोका स्वायविन, लुगा धुने र नुहाउने गरी १र१ वटा साबुन वितरण गरेको थियो । यस अघि पनि आरारम्भले रतुवामाई १० का विभिन्न स्थानहरुका विपन्नलाई राहत वितरण गरिसकेको छ ।
