विराटनगर । १६ औं राष्ट्रपति रनिङ शिल्ड प्रतियोगितामा पदक जित्न सफल कोशी प्रदेशका २८ खेलाडीलाई प्रदेश सरकारले १७ लाख ७५ हजार रुपैयाँ नगद पुरस्कार प्रदान गर्ने भएको छ ।
काठमाडौँमा सम्पन्न प्रतियोगितामा ४ स्वर्ण, ७ रजत र १७ कांस्य जित्दै पदक तालिकामा पाँचौँ स्थान सुरक्षित गरेको कोशीले आफ्ना खेलाडीको मनोबल बढाउन नगद पुरस्कारको तयारी गरेको हो ।
इटहरीबाट काठमाण्डौ खेल्न जाने खेलाडीहरुलाई बिदाइ गर्ने क्रममा मुख्यमन्त्री हिक्मत कुमार कार्कीले पदक जित्नेलाई नगद पुरस्कार दिने घोषणा गरेका थिए । सोही प्रतिबद्धता अनुसार प्रदेश खेलकुद विकास बोर्डले पुरस्कारको रकम र मापदण्ड तय गरेको छ ।
प्रदेश खेलकुद विकास बोर्डका सदस्य सचिव विप्लव घोषका अनुसार स्वर्ण पदक विजेतालाई जनही १ लाख रुपैयाँ प्रदान गरिनेछ । त्यस्तै, रजत पदक जित्नेले जनही ७५ हजार र कांस्य विजेताले जनही ५० हजार रुपैयाँ नगद पुरस्कार पाउनेछन् ।
‘मुख्यमन्त्रीज्यूको घोषणा अनुसार हामीले पदक विजेता खेलाडीहरूको सम्मानका लागि १७ लाख ७५ हजार रुपैयाँ बराबरको पुरस्कार राशि तयार गरेका छौँ,’ सदस्य सचिव घोषले भने, ‘पदक विजेता खेलाडी र प्रशिक्षकहरू प्रदेशमा आइसकेका छन्, छिट्टै एक भव्य कार्यक्रमका बीच उनीहरूलाई पुरस्कृत गर्नेछौँ ।’
यसपटक कोशी प्रदेशले ४ स्वर्णसहित कुल २८ पदक जितेको छ । जसअनुसार स्वर्ण जित्ने चार जनाले ४ लाख, रजत जित्ने सात जनाले ५ लाख २५ हजार र कांस्य जित्ने १७ जनाले ८ लाख ५० हजार रुपैयाँ पुरस्कार पाउनेछन् ।
अघिल्लो वर्ष सम्पन्न १५ औँ संस्करणमा कोशी प्रदेश स्वर्णविहीन बन्दै सातौँ स्थानमा खुम्चिएको थियो । तर, यसपटक नेतृत्वको सक्रियता र १४ वटै जिल्लाका १ हजार ७ सय खेलाडीमध्येबाट चुनिएका ११५ उत्कृष्ट खेलाडीलाई बन्द प्रशिक्षणमा राखेर पठाइएकाले नतिजामा उल्लेख्य सुधार देखिएको हो ।
यसपटक कोशीले करातेमा ३ र तेक्वान्दोमा १ स्वर्ण हात पारेको छ । सरकारको यो प्रोत्साहनले आगामी फागुनमा कोशी प्रदेशमै आयोजना हुने १७ औँ राष्ट्रपति रनिङ शिल्डमा अझै उत्कृष्ट प्रदर्शन गर्न खेलाडीहरूलाई उर्जा मिल्ने विश्वास लिइएको छ ।
२८ पदक जित्ने कोशी प्रदेशका यी खेलाडीहरुले पाउछन् पुरस्कार
प्रतिक्रिया दिनुहोस्
यस लेखमा प्रतिक्रिया बन्द गरिएको छ।