विश्वकप लिग २ : घरेलु मैदानमा अमेरिकाको सामना गर्दै नेपाल

विराटनगर। आईसीसी पुरुष क्रिकेट विश्वकप लिग २ अन्तर्गत आज नेपाल र अमेरिकाबीच कीर्तिपुरस्थित त्रिवि क्रिकेट मैदानमा प्रतिस्पर्धा हुँदैछ। सन् २०२७ को एकदिवसीय विश्वकप छनोटको आधार मानिएको यो खेल दुवै टोलीका लागि अङ्क तालिकामा महत्त्वपूर्ण छ।

जारी लिगमा १८ जितसहित अमेरिका शीर्ष स्थानमा छ भने नेपाल घरेलु मैदानमा उत्कृष्ट पुनरागमन गर्दै पाँचौँ स्थानमा उक्लिएको छ। दुवै टोलीले आफ्नो पछिल्लो खेलमा स्कटल्याण्डलाई ६–६ विकेटले पराजित गरेकाले आजको खेल निकै रोमाञ्चक हुने अपेक्षा गरिएको छ। नेपाली समय अनुसार बिहान ९:३० बजेदेखि सुरु हुने यस खेलमा नेपाललाई घरेलु दर्शकको ठुलो साथ रहनेछ।

ऐतिहासिक तथ्याङ्क हेर्दा यी दुई टोलीबीचको प्रतिस्पर्धा सधैँ कडा हुने गरेको छ। हालसम्म खेलिएका १२ एकदिवसीय खेलमध्ये अमेरिकाले ६ र नेपालले ५ खेल जितेका छन् भने एक खेल बराबरीमा सकिएको छ। नेपालका लागि कुशल भुर्तेल र कप्तान रोहित पौडेल मुख्य ब्याटरका रूपमा रहेका छन् भने अमेरिकाका सौरभ नेत्रभाल्करको बलिङ नेपालका लागि चुनौतीपूर्ण बन्न सक्छ। नेपाल आजको खेल जितेर अमेरिका विरुद्धको ऐतिहासिक दूरीलाई बराबरी गर्ने दाउमा छ।