विराटनगर । कोशी प्रदेशमा पछिल्लो समय वन व्यवस्थापन र काठ उत्पादनबाट उल्लेख्य राजश्व संकलन भएको छ । प्रदेशका विभिन्न वन क्षेत्रबाट संकलन गरिएको काठ, गैरकाष्ठ वन पैदावार र वन क्षेत्रको जग्गा अन्य विकास निर्माणमा प्रयोग गर्न दिएवापत प्रदेश सरकारले करोडौं राजश्व प्राप्त गरेको हो ।
प्राप्त तथ्याङ्क अनुसार कोशी प्रदेशमा सरकारद्वारा व्यवस्थित वन क्षेत्र, सामुदायिक, कबुलियत, निजी र साझेदारी वन गरी विभिन्न माध्यमबाट कुल १ करोड ८३ लाख ९३ हजार ८ सय ५६ क्युबिक फिट काठ संकलन तथा व्यवस्थापन भएको छ । यसमध्ये सबैभन्दा ठूलो हिस्सा निजी तथा नम्बरी वनको रहेको छ । निजी वनबाट मात्रै १ करोड ७७ लाख ८२ हजार क्युबिक फिट काठ र २ हजार ५ सय चट्टा दाउरा उत्पादन तथा बिक्री वितरण भएको छ ।
सरकारीस्तरबाट व्यवस्थापन गरिएको कानेपोखरी-लेटाङ वन क्षेत्रबाट १ लाख ३५ हजार ६ सय ५० क्युबिक फिट काठ लिलाम बिक्री गरिएको छ । त्यसैगरी सामुदायिक, साझेदारी र कबुलियत वनहरूबाट २ लाख ८३ हजार ७ सय ५३ क्युबिक फिट काठ उत्पादन गरी आन्तरिक खपत र लिलाम बिक्री गरिएको छ । साझेदारी वन अन्तर्गत मोरङ जिल्लाका विभिन्न वनहरूबाट १ लाख ४७ हजार ५ सय ४७ क्युबिक फिट काठ र १८१ चट्टा दाउरा संकलनको प्रक्रिया सुरु भएको छ । प्राकृतिक विपद् तथा हावाहुरीका कारण ढलेका रुखहरूबाट पनि ३२ हजार ५ सय ४७ क्युबिक फिट काठ र ४९ चट्टा दाउरा संकलन गरिएको छ ।
राजश्व संकलनका हिसाबले पनि यो वर्ष सुखद देखिएको छ । निजी वन पैदावारको बिक्रीबाट मात्र ६ करोड २ लाख ९२ हजार रुपैयाँ राजश्व संकलन भएको छ भने सेवा शुल्कवापत थप ९ करोड ६ लाख रुपैयाँ प्राप्त भएको छ । यसैगरी, जलविद्युत र सडक विस्तार जस्ता विकास आयोजनाहरूलाई वन क्षेत्रको जग्गा प्रयोग गर्न दिएवापत सरकारले ४ करोड ८१ लाख ७६ हजार रुपैयाँ राजश्व संकलन गरेको छ ।
काठबाहेक गैरकाष्ठ वन पैदावारको क्षेत्रमा पनि प्रगति देखिएको छ । प्रदेशमा कुल ५३ लाख ३९ हजार ७ सय ८१ केजी गैरकाष्ठ वन पैदावार उत्पादन भएको छ, जसबाट ८ लाख ४७ हजार रुपैयाँ राजश्व संकलन भएको छ । यस्ता पैदावारमा लोक्ता, अर्गेली जस्ता कच्चा पदार्थहरू रहेका छन् ।
वन व्यवस्थापनका क्रममा धनकुटा र पाँचथर लगायतका जिल्लामा नर्सरी सुधार र जडीबुटी खेती विस्तारलाई पनि प्राथमिकता दिइएको छ । समग्रमा, वन क्षेत्रको वैज्ञानिक व्यवस्थापन र काठको सदुपयोगले एकातिर प्रदेशको आन्तरिक आवश्यकता पूर्ति गरेको छ भने अर्कोतिर राज्यको ढुकुटीमा ठूलो योगदान पुर्याएको देखिन्छ ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।