इनरुवा । सुनसरीको हरिनगरा गाउँपालिकाबाट प्रहरीले २८ हजार नेपाली नक्कली नोटसहित एक युवकलाई नियन्त्रणमा लिएको छ । पक्राउ पर्नेमा सुनसरीकै इनरुवा नगरपालिका वडा नं. १० बस्ने २५ वर्षीय बहिस मियाँ रहेका छन् ।
बिहीबार राति करिब ८ बजेतिर हरिनगरा गाउँपालिका वडा नं. १ स्थित एउटा किराना पसलमा सामान खरिद गर्ने क्रममा मियाँले नक्कली नोट दिएको सूचना प्राप्त भएपछि प्रहरी सक्रिय भएको थियो । नक्कली नोट दिएर सर्वसाधारणलाई ठग्न खोजेको जानकारी पाउनासाथ प्रहरी चौकी रामनगर भुटाहाबाट प्रहरी टोली घटनास्थल पुगेको थियो ।
प्रहरीले मियाँलाई नियन्त्रणमा लिएर खानतलासी गर्दा उनको साथबाट नेपाली १ हजार दरका २८ थान नक्कली नोट फेला पारेको प्रहरीले जनाएको छ। बरामद गरिएका सबै नोटहरू जाली (नक्कली) देखिएको जिल्ला प्रहरी कार्यालय सुनसरीले जनाएको छ ।
पक्राउ परेका मियाँलाई नक्कली नोटसहित नियन्त्रणमा लिएर थप अनुसन्धानका लागि जिल्ला प्रहरी कार्यालय सुनसरीमा राखिएको छ । उनीमाथि मुद्रा सम्बन्धी कसुर (खोटा चलन) अन्तर्गत मुद्दा चलाउने तयारी भइरहेको र यो गिरोहमा अन्य व्यक्तिहरूको संलग्नता भए–नभएको बारेमा पनि अनुसन्धान भइरहेको प्रहरीले जनाएको छ ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।