विराटनगर । नेकपा माओवादी केन्द्र संसदीय दलका नेता इन्द्रबहादुर आङ्बोले कोशी प्रदेश सरकारमा सहभागी हुने निर्णय गरिसकेको नेपाली कांग्रेसले प्रमुख प्रतिपक्ष दलको सुविधा लिइरहेको बताएका छन् । सामाजिक सञ्जाल फेसबुकमा लामो स्टाटस लेख्दै नेता आङ्बोले कोशी प्रदेशमा राजनीतिक रुपमा नेकपा एमाले र नेपाली कांग्रेसकै संयुक्त सरकार रहेको दाबी गरेका छन् । उनले लेखेका छन् ‘राजनैतिक रुपमा कोशी सरकार एमाले कांग्रेसको संयुक्त सरकार नै हो तैपनि आजका दिनसम्म कांग्रेसले प्रमुख प्रतिपक्षको हैसियत र सुविधा लिइराखेकै छ ।’
नेता आङ्बोले नेपाली कांग्रेस सरकारमा औपचारिक रुपमा सहभागी नहुनु उसको आन्तरिक कारण भएको दाबी गरेका छन् । गुट व्यवस्थापन र मन्त्रालय विभाजनमा कुरा नमिलेकै कारण कांग्रेस सरकारमा सहभागी नभएको उनको जिकिर छ । उनी भन्छन् ‘गुट व्यवस्थापन र मन्त्रालय विभाजनमा कुरा नमिलेर मात्र कांग्रेस सरकारमा सहभागी नभएको हो ।’
विगतमा सरकारलाई समर्थन गरेर पनि प्रमुख प्रतिपक्ष दलको हैसियत र सुविधा लिएको स्मरण गर्दै उनले अहिले सरकारलाई समर्थन कायम राखेको बहानामा नेकपा माओवादी केन्द्रलाई प्रमुख प्रतिपक्ष दलको हैसियत दिन नचाहेको आरोप उनले लगाएका छन् । नेता आङ्बोले घुमाउरो भाषा प्रयोग गर्दै त्यस्तो आरोप लगाएका हुन् । उनी भन्छन् ,‘एमालेले तत्कालीन मुख्यमन्त्री केदार कार्कीलाई सरकार बाहिर बसेर समर्थन दिइराखेरै प्रमुख प्रतिपक्षी दलको हैसियत र सुविधा लिएको थियो ।’ यद्यपि उनले नेकपा माओवादीलाई अहिले नै प्रमुख प्रतिपक्षी दलको सुविधा भने आवश्यक नपरेको पनि बताएका छन् । ‘कतै भ्रम नहोस् माओवादील आजको दिनसम्म प्रदेश सभामा प्रमुख प्रतिपक्षी दलको हैसियत र सुविधाको दाबी गरेको छैन र गरिराख्न जरुरी पनि छैन, सरकारलाई दिएको समर्थन बोर उचित समयमा निर्णय गरिने छ,’ उनले लेखेका छन् ।
मन्त्रिपरिषदलाई पूर्णता दिने क्रममा प्रदेश सरकारको दीर्घकालीन दायित्व र व्ययभार घटाउन र सुशासन कायम गर्न पहिले विभाजन गरिएका मन्त्रालयहरु एकीकृत(मर्ज) गर्दा ऐतिहासिक सफलता हासिल गरेको दाबी गर्नुभएका मुख्यमन्त्री हिक्मतकुमार कार्कीको प्रतिबद्धता कायम राख्ने अग्नी परीक्षा पनि सुरु भएको नेता आङ्बोले बताएका छन् । उनले कांग्रेसभित्रको गुटगत कलह व्यवस्थापनको दबाबमा मन्त्रालय विभाजन हुनसक्ने आशंका गर्दै मुख्यमन्त्रीको भूमिकालाई जनताले नजिकबाट नियालिरहेको पनि बताएका छन् । आङ्बो अन्त्यमा लेख्छन्, ‘दीर्घकालीन दायित्व र व्ययभार घटाउन र सुशासन कायम गर्न विभाजित मन्त्रालय एकीकृत(मर्ज) गरेर ऐतिहासिक सफलता हासिल गरेको औपचारिक दाबी गर्नुहुने माननीय मुख्यमन्त्री ज्यूको अग्नी परीक्षा सुरु भएको छ, कांग्रेसभित्रको गुट र कलह व्यवस्थापनको दबाबमा मन्त्रालय विभाजन गर्नुहुन्छ या तपाईंले ठूलो सफलता दाबी गर्नुभएको आफ्नो मान्यता मन्त्रालयको मर्जमा अडिनुहुन्छ, प्रदेशवासीले नजिकैबाट नियालिराखेका छौं है !’
