विराटनगर । भन्सार छलेर भारतबाट विराटनगरतर्फ लत्ताकपडा ओसारपसार (क्यारिङ) गर्ने एक जना महिला ७ महिनापछि पक्राउ परेकी छन् । मोरङको सुन्दरहरंैचा नगरपालिका–८ घर भएकी दुर्गा घिमिरे पक्राउ परेकी हुन् । उनी चोरी पैठारी मुद्दामा फरार थिइन् ।
उनीविरुद्ध ७ माघ २०८० मा विराटनगर भन्सार कार्यालयले पक्राउ पूर्जी जारी गरेको थियो । लामो समयसम्म पनि उनी पक्राउ नपरेपछि उक्त घटनामा पीडित भएका एक जना सवारी चालकले उनलाई प्रहरी समक्ष जिम्मा लगाएका हुन् । विराटनगर ७ का ४२ वर्षीय जयकुमार राईसहित उनका आफन्तले सोमबार सुन्दरहरैंचा ८ स्थित घिमिरेको घरबाटै समातेर इलाका प्रहरी कार्यालय बेलबारीमा जिम्मा लगाएका थिए ।
भारतबाट तस्करीको सामान क्यारिङ गर्दै आएकी घिमिरेले ९ कार्तिक २०८० मा दुई जना व्यक्तिमार्फत प्रदेश १–०४–००१ च ०११० नम्बरको बोलेरो भाडामा लिएकी थिइन् । विराटचोकसम्म सामान ढुवानी गर्नका लागि भनेर उनीहरुले राईको उक्त बोलेरो पिकअप रिजर्भ गरेका थिए । सामान लोड गर्ने बेलामा उनले बिलबिजक पनि हेरेका थिए । भन्सार बिल बिजक भएका कारण उनले सहजै सामान लोड गरे । बिलबिजक पनि भएको र गुडिया बनाउने सामान उल्लेख भएकोले उनले सामान नहेरी गाडीमा लोड गरेको बुधबार विराटनगरमा पत्रकार सम्मेलन गरी बताए ।
विराटनगरको गुद्रीबाट लोड गरेको सामान कन्चनबारी पुग्नासाथ सशस्त्र प्रहरीले नियन्त्रणमा लियो । त्यसपछि भन्सार छलिगरेको सामान भन्दै गाडीसमेत प्रहरीले नियन्त्रणमा लिएर भन्सारमा बुझाइदियो । ‘प्रहरीले नियन्त्रणमा लिएपछि मात्र मैले भन्सार छलेको सामान रहेछ भन्ने थाहा पाएँ,’ राईले भने ‘म अनाहकमा फस्न पुगें, मैले बिल हेर्दाहेर्दै पनि तस्करीको सामान भएको थाहा नपाउँदा दुःख पाउनु प¥यो, यसरी मलाई फसाउने व्यक्तिलाई खोजेर आफैंले समातेर प्रहरीको जिम्मा लगाएको छु, मलाई न्याय मिल्छ होला !’
सशस्त्र प्रहरीले त्यसबेला ७ लाख ५० हजार रुपैयाँ मूल्य बरावरको ८३४ थान कुर्तासलवार पिकअप गाडीबाट बरामद गरेको थियो । प्रहरीले नियन्त्रणमा लिएसँगै गाडीमा सामान लोड गरेका दुवै जना केटाहरु भागेका थिए । सशस्त्र प्रहरीले पिकअप गाडीसहित राईलाई विराटनगर भन्सार कार्यालयमा बुझायो । नियन्त्रणमा परेको चार दिनपछि राईका परिवारले ऋण खोजेर १३ कार्तिक २०८० मा ८ लाख ५० हजार ६ सय रुपैयाँ धरौटी बुझाएर रिहा भए । उनको गाडी अहिले पनि भन्सार कार्यालयकै नियन्त्रणमा रहेको छ ।
भन्सार कार्यालयले कपडा क्यारिङ गर्ने व्यक्ति घिमिरेलाई पक्राउ गर्न सघाएमा राईलाई सजाय माफि मिनाहा गराउन पहल गरिदिने बताएपछि उनले खोजेर उनलाई प्रहरीको जिम्मा लगाएका हुन् । राई धरौटिमा रिहा भएको १० महिनापछि क्यारिङ गर्ने घिमिरेलाई पक्राउ गरी प्रहरीलाई जिम्मा लगाएका थिए ।
प्रहरीले घिमिरेलाई बुधबार विराटनगर भन्सार कार्यालयमा बुझाएको छ ।
चालकद्वारा न्यायको अपिल
क्यारिङ गर्ने महिलालाई पक्राउ गरी प्रहरी समक्ष जिम्मा लगाएपछि जयकुमार राईसहित उनका परिवारले न्यायोचित न्यायको लागि माग गरेका छन् । विराटनगरमा बुधबार पत्रकार सम्मेलन गरी उनीहरुले धरौटी रकम फिर्ता पाउनुपर्ने र भन्सारमा रहेको गरिखाने पिकअप फिर्ता गरिदिन आग्रह गरेका हुन् ।
‘भएको यही गाडीले परिवार पाल्दै आएको थिएँ । यही पिकअप भेन चलाएर दैनिक गुजरा चलाउँदै आएको थिएँ अहिले हाम्रो बिचल्ली भएको छ,’ उनले भने । ‘बिलबिजकसहित सामान लिएर आएपछि लोड गरेर गन्तब्यसम्म जार्दै गर्दा मलाई फसाएर भन्सार छली गरेको सामान लोड गरेका रहेछन् । यसमा मेरो के गल्ती भयो र ? ऋण खोजेर भन्सारले भनेको धरौटी रकम बुझाएको छु । त्यसपछि भन्सारले कपडा धनीलाई नियन्त्रणमा लिएर बुझाए सजायमा केही हेरिदिने भनेकाले मैले १० महिना खोजेर उनलाई पनि प्रहरीको जिम्मा लगाइदिएको छु,’ उनले भने, ‘मेरो अहिले एउटै माग मेरो धरौटी रकम र खरिखाने गाडी फिर्ता दिलाइदिनुहोस् भन्ने मात्र छ ।’
क्यारिङ गर्ने महिलाले राईलाई विभिन्न प्रलोभन दिएकी थिइन् । तर राई प्रलोभनमा नपरी उनलाई प्रहरीको जिम्मा लगाइदिए । ‘ उनले धरौटी रकम फिर्ता दिने र भन्सार बुझाएको गाडी पनि निकालिदिने वडा कार्यालयमा बसेर लिखित सहमति पनि गरेकी थिइन् । ‘हामी पनि सोझा मान्छे होला नि भनेको थियौं । तर, १० महिना भयो । हाम्रो गरिखाने गाडी नै निकालिदिएन । क्यारिङ गर्ने मानिसलाई घिमिरेले अत्याचार गरेपछि हामी पनि बाध्य भएर घरमा पुगेर प्रहरीको जिम्मा लगाएका हौं,’ राईले भने ‘हामी गरिब मान्छेलाई न्याय दिनुपर्यो ।’
