विराटनगर । कुनै बेला कम्युनिष्ट आन्दोलनको केन्द्र बनेको झापा यतिबेला देशको ‘शक्ति केन्द्र’ बनेको छ । झापा विद्रोह अहिले पनि चर्चित छ । २०२८ सालमा सामन्तको टाउको काट्ने अभियानबाटै जन्मिएका कम्युनिष्ट नेताहरु सत्तामा पुगेपछि झापा राजनीतिक ‘शक्ति केन्द्र’ बनेको हो ।
प्रधानमन्त्रीमा नियुक्त नेकपा एमालेका अध्यक्ष केपी शर्मा ओलीले सोमबार शपथग्रहण गरिसकेका छन् । झापा आन्दोलनबाटै उदाएका ओली योसँगै चार पटक प्रधानमन्त्री बनेका हुन् ।
उनी देशको दोस्रो ठूलो पार्टीको शक्तिशाली अध्यक्ष छँदैथिए । उनको जिम्मेवारीमा अब देशको कार्यकारी प्रमुखको अर्को जिम्मेवारी पनि थपिएको छ । ओली झापाको ५ नम्बर निर्वाचन क्षेत्रबाट निर्वाचित भएका प्रतिनिधिसभा सदस्य हुन् । बरियतामा राष्ट्रपति र उपराष्ट्रपतिपछि प्रधानमन्त्री तेस्रो स्थानमा रहेको छ ।
यस्तै झापाको २ नम्बर निर्वाचन क्षेत्रबाट निर्वाचित देवराज घिमिरे प्रतिनिधिसभाका सभामुख छन् । सभामुख देशको पाँचौं बरियताको पद हो । उनी पनि झापा विद्रोहबाटै प्रभावित हुँदै कम्युनिष्ट बनेका नेता हुन् ।
वि.सं. २०३१ सालमा झापा विद्रोहपछि अपिल प्रसारणको लाइनबाट नेपाल कम्युनिष्ट पार्टीको सम्पर्कमा रहेका घिमिरे २०३२ माघदेखि अखिल नेपाल कम्युनिष्ट क्रान्तिकारी को–अर्डिनेशन कमिटी (कोके)गठनपछि विद्यार्थी संगठनमार्फत पार्टी काममा होमिएका थिए । लामो समय एमालेको राजनीति गरेका उनी अहिलेका प्रधानमन्त्री केपी शर्मा ओलीका प्रिय पात्र पनि हुन् ।
प्रधानमन्त्री केपी शर्मा ओलीका छिमेकीसमेत रहेका तथा कम्युनिष्ट राजनीतिको लामो अनुभव भएका राष्ट्रियसभा सदस्य देवेन्द्र दाहाल भौतिक पूर्वाधार विकास मन्त्री बनेका छन् । उनी पनि ओलीका प्रिय पात्र हुन् । राज्यको सबैभन्दा धेरै पूँजीगत खर्च गर्नसक्ने भौतिक पूर्वाधार विकास मन्त्रालयको जिम्मेवारी उनको काँधमा आएको छ ।
यस्तै कोशी प्रदेशका मुख्यमन्त्री पनि झापा र ओलीकै निर्वाचन क्षेत्रबाट निर्वाचित प्रदेश सांसद हिक्मतकुमार कार्की छन् । ओलीका अति निकट कार्की पनि विद्यार्थी राजनीति हुँदै पार्टीमा संगठित भएका हुन् । गत वैशाख २७ गते तेस्रो पटक मुख्यमन्त्री बनेका कार्कीलाई माओवादीसहितले समर्थन गरेको हो । केन्द्रीय गठबन्धनमा भएको अदलबदलसँगै अब काँग्रेसले पनि समर्थन गर्दा कार्की झनै शक्तिशाली मुख्यमन्त्री बन्नेछन् ।
प्रधानमन्त्री, सभामुख, संघीय मन्त्री, मुख्यमन्त्रीबाहेक झापाबाटै संघीय संसदको उपसभामुखको रुपमा इन्दिरा रानाले भूमिका निभाइरहेकी छिन् । यस्तै कोशी प्रदेशको सभामुख अम्बरबहादुर विष्ट पनि झापाकै हुन् । कोशी प्रदेशको हालको मन्त्रीमण्डलमा रहेका एकराज कार्की पनि झापाकै हुन् ।
नेपाली काँग्रेसका महामन्त्री विश्वप्रकाश शर्मा झापा क्षेत्र नं. १ सांसद हुन् भने राप्रपाका अध्यक्ष राजेन्द्र लिङ्दने झापा क्षेत्र नं. ३ का सांसद हुन् । राष्ट्रिय सभामा नेपाली काँग्रेस संसदीय दलका नेता कृष्णप्रसाद सिटौला पनि झापाकै हुन् ।
संघीय निर्वाचन क्षेत्र ५ र प्रदेश निर्वाचन क्षेत्र १० रहेको झापामा समानुपातिक प्रतिनिधिसभामा १२ राष्ट्रियसभामा २ र कोशी प्रदेशसभामा २० सहित ३४ जनाको प्रतिनिधित्व छ । कोशी प्रदेश काँग्रेस संसदीय दलका नेता उद्धब थापा र राप्रसा संसदीय दलका नेता भक्तिप्रसाद सिटौला पनि झापाकै हुन् ।
