विराटनगर । मोरङको सुन्दरहरैँचामा कुखुरा फर्मभित्र विभत्स अवस्थामा हत्या गरिएको एक पुरुषको शव भेटिएको छ ।
बिहीबार बिहान सुन्दरहरैँचा नगरपालिका–९ का ४९ वर्षीय सहदेव बजगाईंको शव भेटिएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले जानकारी दिए ।
प्रहरीका अनुसार बजगाईं कुखुरा फर्म सञ्चालक हुन् । घरनजिकै कुखुरा फर्म सञ्चालन गर्दै आएका बजगाईंको त्यही फार्मभित्र बिहीबार करिब साढे १० बजे शव फेला परेको हो । प्रहरीका अनुसार बजगाईंको टाउको क्षतविक्षत अवस्थामा भेटिएको छ भने शरीरका अन्य भागमा चोट देखिएको छ ।
बजगाईंको खुकुरा फार्ममा काम गर्नका लागि एक दम्पत्ती बसेका थिए । घटनापछि दुई जना फरार रहेको प्रहरीले जनाएको छ । फर्मभित्रै भएको घटनापछि काम गर्ने व्यक्ति फरार रहेकोले हत्यामा उनीहरुकै संलग्नता रहेको आशंका प्रहरीले गरेको छ ।
घटनास्थलमा रगत लतपतिएको अवस्थामा एउटा बन्चरो र दाउरा फेला परेको छ । मृतकको शरीरमा पनि बन्चरो र दाउले प्रहार गरेजस्तो चोट देखिएको भन्दै प्रहरीले थप अनुसन्धान भइहरेको जनाएको छ ।
