विराटनगर । इटहरीस्थित एभरेष्ट बैंक ठगी प्रकरणमा विराटनगर– ८ का ३४ वर्षीय निरज प्रधान पुर्पक्षको लागि कारागार चलान भएका छन ।
एभरेष्ट बैंक उदयपुरका अपरेसन मेनेजर रहेका प्रधान पुर्पक्षको लागि कारागार चलान भएका हुन्।
उच्च अदालत विराटनगरको संयुक्त वाणिज्य इजलासका न्यायाधीश कृष्णकमल अधिकारी र राजनप्रसाद भट्टराईको इजलासले प्रधानलाई पुर्पक्षको लागि थुनामा राख्न सोमबार आदेश गरेको हो।
एभरेष्ट बैंक इटहरी शाखाबाट १ करोड ५० लाख २३ हजार ४३४ रुपैयाँ बैंकका कर्मचारीले मिलेमतोमा गायब पारेका थिए। यो प्रकरणमा बैंकका ७ जना कर्मचारी र २ जना सहयोगी पक्राउ परेका थिए।
उच्च अदालतमा अभियोग दर्ता भएपछि सोमबारको थुनछेक आदेशले पैसा झिक्ने दुई जना कर्मचारीलाई जनही ७ लाख र पक्राउ परेका ६ जना कर्मचारीलाई साधारण तारेखमा छोड्न उच्च अदालत विराटनगरले आदेश गरेको अदालतका सूचना अधिकारी ओमराज सुवेदीले जानकारी दिए।
साधारण तारेखमा रिहा हुनेहरूमा बैंकको इटहरी शाखा प्रबन्धक सिन्धुपाल्चोक बाह्रबिसे ८ घर भएका ४२ वर्षीय विश्वराज शाक्य, बैंक इटहरी शाखाका सुपरभाइजर ३७ वर्षीय धावा लामा, बैंकका कनिष्ठ सहायकहरू २७ वर्षीय मनोज घिमिरे, २७ वर्षीय देवराज शर्मा, २७ वर्षकै रंजित पण्डित, बैंकको इटहरी शाखाकी टेलर ३० वर्षीय पवित्रा कटुवाल छन्।
यस्तै, धनुषाको मिथिला नगरपालिका ११ का ३४ वर्षीय शंकर भुजेल, भक्तपुरको सूर्यविनायक नगरपालिका २ का २७ वर्षीय अजय खिउजूलाई अदालतले जनही ७/७ लाख रुपैयाँ धरौटी राख्न आदेश गरेको छ।
सुनसरी जिल्ला सरकारी वकिलको कार्यालयले मुख्य योजनाकार प्रधानसहित उच्च अदालतमा शुक्रबार १३ जनाविरूद्ध बैंकिङ कसुरमा मुद्दा दायर गरेको थियो।
पक्राउ परेका ९ र फरार ४ जना गरी १३ जनाविरूद्ध अभियोग दर्ता गरेको थियो। चार जनाको हकमा अदालतमा उपस्थित भएको बखत अदालतले आदेश गर्नेछ।
अभियोग पत्र अनुसार ३३ जना बचतकर्ताहरूले जम्मा गरेको रकम अपचलन भएको छ।
अनुसन्धानका क्रममा प्रहरीले यसअघि २०७९ चैत १२ गते एभरेष्ट बैंक गाईघाट शाखाका अपरेसन इञ्चार्ज प्रधानलाई पक्राउ गरेको थियो। प्रधानमाथि केरकार गर्दा बैंकभित्रको संगठित जालो पत्ता लागेको थियो।
पाँच महिनाको अवधिमा ३३ जना ग्राहकको खाताबाट ५९ पटक कनेक्ट आइपिएस र नक्कली चेकबुक प्रयोग गरेर १ करोड ५० लाख २३ हजार ४३४ रुपैयाँ चोरी भएको अनुसन्धानबाट खुलेको छ।
इटहरी शाखामा कार्यरत प्रधानको गत मार्च १२ मा गाईघाट सरूवा भएको थियो। उनको योजनामा गत १४ नोभेम्बर २०२२ देखि ३१ मार्च २०२३ सम्म पाँच महिनाको अवधिमा ५९ पटक कनेक्ट आइपिएसबाट एक करोड १४ लाख ७५ हजार २८४ रुपैयाँ निकालिएको छ। त्यस्तै, नक्कली चेकमार्फत ३५ लाख ४८ हजार १५० रुपैयाँ निकालिएको प्रहरीले बताएको छ।
जेल चलान भएका प्रधानले अनलाइन जुवा वन एक्सबिएटमा सबै पैसा खर्चिएको प्रहरीलाई बयान दिएका थिए।
कर्मचारीले ३३ जना ग्राहकको खाताबाट अधिकतम ७ लाखसम्म निकालेको देखिएको प्रहरीले बताएको छ। आफ्नो खाताबाट रकम हराएपछि ग्राहकले बैंकमा जानकारी गराएका थिए।
