विराटनगर । नेकपा माओवादी केन्द्र विराटनगर महानगरपालिका वडा नम्बर ४ ले शनिबार वृहद् घैरदैलो तथा र्याली प्रदर्शन गरेको छ । युवा विद्यार्थी जिसस न्यौपानेलाई वडाध्यक्षको उम्मेदवार बनाएको माओवादीको पक्षमा वडामा चुनावी माहौल उर्लिएको छ ।
शनिबार विहान वडाको राजवंशी चोकबाट सुरु भएको वृहद् र्यालीले खार्जी, थानीटोल, कञ्चनबारी, गोकुलटोल हुँदै काबेलीमा पुगेर पुनः र्याली सहित घरदैलो अभियान सञ्चालन गरेको थियो ।
थारु समुदायका महिला पुरुष, मधेशी युवाहरु तथा उल्लेख संख्यामा सबै जाति समुदायको उपस्थिति रहेको चुनाव प्रचार र्यालीले जामुनगाछी क्षेत्र परिक्रमा गरेको थियो । जामुनगाछीबाट पुलचोक, दामाबन्दी, इक्राही दक्षिण यादव टोल, उत्तर यादव टोल, र इक्राई चोकसम्म घरदैलो गरेको थियो ।
नेकपा माओवादी केन्द्रले विराटनगर ४ मा युवा उम्मेदवार न्यौपानेको नेतृत्वमा रनियादेवी मण्डल, रिता ऋषिदेव, रञ्जनकुमार पोखरेल र सन्तोष माझीलाई सदस्य पदको उम्मेदवार बनाएको छ । थारु बहुल क्षेत्र वडा नम्बर ४ बाट प्रमुख दलहरु नेपाली काँग्रेस, नेकपा एमाले, नेकपा माओवादी केन्द्र र जनता समाजवादी पार्टीमध्ये माओवादीले मात्र थाारु उम्मेदवार दिएको छ ।
नेपाली काँग्रेसको निर्णय विपरित कुनै नेताको दबाबमा सञ्जय मण्डल उम्मेदवार बनेपछि काँग्रेसभित्र ठूलो अन्तरविरोध पैदा भएको छ । वडाको भौगोलिक र जातीय सन्तुलन नमिलाएका कारण यतिबेला माओवादी बाहेकले चुनावी माहौल सिर्जना गर्न नसकेको स्थानीयहरुको विश्लेषण छ ।
शनिबारको शक्ति प्रदर्शनपछि विराटनगर ४ मा नेकपा माओवादी केन्द्रले सबैलाई उछिनेर अघि बढेको काँग्रेस समर्थक कार्यकर्ताहरुले फेसबुकमै सार्वजनिक गर्न थालेका छन् । नेकपा एमाले निकट प्रेस चौतारी नेपाल मोरङका पूर्व अध्यक्ष माधव अधिकारीले कञ्चनबारीमा माओवादीको ¥याली हेरेपछि फेसबुक कमेन्ट लेख्दै भनेका छन् ‘यो र्यालीले तपाईंको जित निश्चित गरेको देखियो ।’
यस अघि नेपाली काँग्रेसले जितेको वडामा नेकपा एमाले दोश्रो स्थानमा रहेको थियो । पछिल्लो समय काँग्रेसको चुनावी माहौल कमजोर बनेको छ भने माओवादीले काँग्रेसलाई उछिनेर आक्रमक तयारी बढाएको छ । चुनावमा जित्ने दाबी गरिरहेको नेकपा एमाले बनिबारबाट तेश्रो स्थानमा झरेको अनुमान स्थानीयले गरेका छन् । स्थानीय तिलकराम माझीले भने ‘हाम्रो वार्डको एक छेउमा मात्र एमालेको उपस्थिति छ, यस पटक एमालेले राम्रो गर्यो भने तेस्रो नत्र चौथो स्थानमा पुग्छ, मैले भनेको लेखेर राख्नुस् ।’
