विराटनगर । उच्च शिक्षालय तथा माध्यमिक विद्यालय संघ (हिसान ) मोरङले नवौ हिसान स्पोट्र्स मिट गर्ने भएको छ । विराटनगर हुने हिसान स्पोट्र्स मिट अन्तरगत क्रिकेट प्रतियोगिता मात्र पुष २४ गतेदेखि विराटनगरका वैजनाथ क्रिकेट मैदानमा हुने हिसान मोरङका अध्यक्ष राजेश कार्कीले जानकारी दिए ।
पुष २९ गतेसम्म हुने प्रतियोगितामा हिसानमा आवद्ध भएका जिल्लाका १३ वटा कलेजका १ सय ९५ खेलाडीहरूको सहभागि हुने अध्यक्ष कार्कीले जानकारी दिए । ‘विगतका वर्षहरूमा हिसानले महोत्सवको रुपमा गदै आएकोमा यस पटक क्रिकेट मात्र समावेश गरि हिसान स्पोट्र्स गर्ने’ उनले भने ।
हिसान आवद्ध कलेजका विद्यार्थीहरू बीच प्रतिस्पर्धा गराउँदै उत्कृष्ट खेलाडी र कुशल समाज निर्माण गर्ने उद्देश्यले खेलकुद प्रतियोगिता आयोजना गरेको अध्यक्ष कार्कीले बताए ।
‘पढाईसँगै अतिरिक्त क्रियाकलापहरूमा पनि अगाडी बढाउन हिसानले प्रत्येक वर्ष खेलकुद प्रतियोगिता आयोजना गर्दैछ,’ अध्यक्ष कार्कीले भने । प्रतियोगिता आयोजना गर्न करिब ४ देखि लाख खर्च हुने अध्यक्ष कार्कीले बताए । पहिलो खेल कान्तपुर कलेज र मेरील्याण्ड कलेज र दोस्रो खेल ग्रिनल्याण्ड कलेज र कोवास कलेज विच हुनेछ ।
