काठमाडौं । नेकपा माओवादी केन्द्रको विद्यार्थी विशेष जिल्ला समितिका अध्यक्ष रञ्जित तामाङले पार्टीमा आन्तरिक चुनावको ढोका खुलेको बताएका छन् ।
सहमति हुन नसकेपछि माओवादी केन्द्र बागमती प्रदेश पदाधिकारीका लागि चुनाव भएपछि अध्यक्ष तामाङले अब राष्ट्रिय सम्मेलनमा पनि चुनाव हुने संकेत देखा परेको बताए ।
उनले भने, ‘बागमती प्रदेशमा चुनावमार्फत नेतृत्व चयन भएसँगै पार्टीमा चुनावी ढोका खुल्यो । अब पार्टीको केन्द्रीय समितिमा पनि चुनाव हुन सक्छ । राष्ट्रिय सम्मेलनमा पनि चुनाव हुने सम्भावना बढेको छ ।’
पार्टीका केन्द्रीय समितिका आकांक्षीहरु धेरै रहेको उल्लेख गर्दै उनले चुनाव गर्दा सहज हुन्छ भन्ने मत बलियो हुँदै गएको बताए । यस्तो मत राख्नेहरुलाई बागमती प्रदेशले चुनाव गरेर बाटो खोलिदिएको उनको भनाइ छ ।
‘पार्टीभित्र अनेकौं समूह र गुटहरु छन् । चुनाव नगरेपनि पार्टीभित्र गुट बनिहाल्दा रहेछन्’ उनले भने, ‘चुनाव गर्दा दुईवटा गुट बन्लान्। बरु यो असंख्य समूह र भद्रगोल भन्दा त दुई वटा गुटको म्यानेज गर्न सजिलो होला ।’
