बेबी पाउडरबाट क्यान्सरको जोखिम, प्रयोग नगर्न सुझाव

विराटनगर । अमेरिका र क्यानडामा प्रतिबन्ध लगाइएको बेबी पाउडरले बालबालिकाको स्वास्थ्यमा प्रतिकूल असर गर्ने भन्दै प्रयोग नगर्न चिकित्सकले सुझाव दिएका छन् ।

‘उक्त बेबि पाउडर नेपाली आमाहरुले छोरा/छोरीलाई नुहाएपछि जिउ र गुप्तागंमा पाउडर दलिदिन्छन्। यसो गर्दा उनको शरीरबाट बास्ना आउँछ सफा देखिन्छ भन्ने विचार होला,’ चिकित्सक डा.अरुणा उप्रेतीले सेतोपाटी अनलाइनमा प्रकाशित एक लेखमा भनेकि छन्, ‘तर, वास्तवमा यस्तो पाउडरले हानी गर्छ। अमेरिकामा ‘जोनसन एण्ड जोनसन’को पाउडर अहिले बेचिन्न। किनभने त्यहाँ केही महिलाहरूलालई यो पाउडर प्रयोग गरेपछि पाठेघरको क्यान्सर भयो।’

सन् २०२०, १९ मे मा ‘जोनसन एण्ड जोनसन’ले बेबीको पाउडरलाई अमेरिका र क्यानडाका बजारबाट हटायो। तर, त्यही पाउडर नेपाल, भारत र बंगलादेशमा सहजैसँग बिक्री भइरहेछ। अफ्रिका राज्यको कङ्गोमा पनि त्यहाँको सरकारले नोबेम्बर, सन् २०२० मा आफ्नो देशभित्र बेबी पाउडरको विज्ञापन गर्न, बेच्न रोक लगायो ।

‘जोनसन ऐन्ड जोनसन’ शिशु पाउडरमा मिसाइएको तत्व महिला तथा बालबालिकाहरूलाई हानिकारक मानिँदै आएको छ। हजारौं महिलाहरूले उक्त कम्पनीलाई उक्त पाउडर प्रयोग गरेर क्यान्सर भएको भनेर अदालतमा मुद्दा लगाएका थिए,’ उप्रेतिको लेखमा उल्लेख छ, ‘मुद्दा अनुसार माहिलाहरूको क्यान्सर भएर मृत्यु भएको थियो। त्यही मुद्दामा २२ जना महिलाहरूले मुद्दा दायर गरेका थिए।’

बच्चाहरूलाई प्रयोग गर्ने पाउडरमा ‘एबसटस’ले स्वास्थ्यमा नकारात्मक असर पार्ने भएकोले त्यस्तो पाउडर प्रयोग नगर्नु भनेर अमेरिकन भोजन र औषधी प्रशासनले नोटिस निकालेपछि ‘जोनसन एण्ड जोनसन’ नामक कम्पनीलाई विभिन्न व्यक्तिहरूबाट दुई हजार भन्दा बढी मुद्दा लाग्यो। तर, नेपालमा पनि औषधी व्यवस्था विभागले जनस्वास्थ्यलाई खासै चासो दिएको पाइएको छैन।

डाक्टर उप्रेतिले कुनै पनि स्वास्थ्यकर्मीले बच्चालाई तोरीको तेलले मालिस नगर्नु, बच्चालाई घाममा नराख्नु भनेर सिकाउँदैन भन्दै आफ्नो परम्परागत विधि नै राम्रो भएको बताएकी छिन् । ‘तेल लगाउनाले अर्थात् मालिसले हाड, जोर्नी बलियो बनाउँछ। साथै बच्चाको तनाव पनि कम गराउँछ। बच्चाको व्यायाम पनि हुन्छ,’ उनले भनेकि छिन्, ‘जाडोमा घाममा बसेर तेल लगाउनाले बच्चाले भिटामिन डी पनि पर्याप्त पाउँछ। अनेक थरीका पाउडर छोडेर स्वस्थकर तेल लगाउनु फाइदा हुन्छ।’