विराटनगर । प्रदेश सरकार गठनको ३ वर्ष अवधि पूरा गरेको अवसरमा सोमबार विराटनगरस्थित मुख्यमन्त्री तथा प्रदेश मन्त्रीपरिषदको कार्यालयमा एक कार्यक्रम आयोजना भयो । तर, कार्यक्रममा मुख्यमन्त्री शेरधन राईपक्षकै सांसदको अनुपस्थिति थियो ।
मुख्यमन्त्री राई पक्षकै सांसदहरू अनुपस्थिति रहेको कार्यक्रममा नेकपा बहुमत पक्ष (प्रचण्ड–माधव)का सांसदहरुले त घोषणा गरेरै कार्यक्रम बहिष्कार ग¥यो । कांग्रेसका तर्फबाट चार जना सांसदको उपस्थिति थियो भने नेकपाका अन्य ९ जना सांसदको उपस्थिति थियो । तर, कांग्रेसका संसदीय दलका नेता राजिव कोइरालाले आफूहरुको कार्यक्रमसँग जुधाएर कार्यक्रम राखेको कारण आफूहरु सल्लाह गरेरै नगएको बताउनु भयो ।
नेकपा प्रचण्ड–माधव समूहका नेता इन्द्रबहादुर आङ्बोले अविश्वासको प्रस्ताव दर्ता भएर सरकारको वैधानिकता समाप्त भइसकेको हुँदा नैतिकताको आधारमा आफूहरु कार्यक्रममा सहभागी हुन नसकेको बताउनु भयो ।
यता, जनता समाजवादी पार्टीका जयराम यादव कार्यक्रममा सहभागी भएपनि कार्यक्रम फितलो भएको भन्दै बीचैमा उठेर हिंड्नु भएको थियो । २३२ वटा उपलब्धी सार्वजनिक गर्ने समारोहमा १३ जना सांसद मात्रै उपस्थित हुुनु र निजी क्षेत्रको निराशाजनक उपस्थितिले कार्यक्रम नै फितलो (असफल) देखिन्थ्यो । ‘सरकारले उपलब्धीको रुपमा जसरी व्याख्या गरेको छ, जनताले त्यो अनुभूति गरेका छैनन्,’ यादवले भन्नुभयो ।
दुई सय मानिस अट्नेगरी बनाइएको समारोहस्थलमा कर्मचारीहरुको उपस्थिति मात्रै देखिन्थ्यो । त्यसका अलावा निजी क्षेत्रबाट विराटनगरका उद्योगीहरु भीम घिमिरे, प्रकाश मुन्दडा, नविन रिजाल र सुजन थापाको मात्रै उपस्थिति थियो । निमन्त्रणा गरेअनुसार विराटनगरका उच्च घरानाका उद्योगी, बुद्धिजीवि, समाजसेवी तथा लब्ध प्रतिष्ठित व्यक्तिहरु समारोहमा उपस्थित देखिएनन् ।
कार्यक्रमको अवसरमा प्रदेश प्रमुख सोमनाथ प्यासी, मुख्यमन्त्री शेरधन राईलगायतले सार्वजनिक गर्नुभएको गोजी पुस्तिकामार्फत सरकारका २ सय ३२ बुँदे उपलब्धि सार्वजनिक गर्नुभयो । उपलब्धीमा ४९ वटा मूल ऐन, २२ वटा नियमावली, १० वटा निर्देशिका, २८ वटा कार्यविधि निर्माण गरिसकेको उल्लेख छ ।
