आयोगमा आधिकारिकताको दावी गर्छौं : खनाल

विराटनगर । पूर्व प्रधानमन्त्री तथा नेपाल कम्युनिष्ट पार्टी (नेकपा)का वरिष्ठ नेता झलनाथ खनालले पार्टीको आधिकारिकताका लागि निर्वाचन आयोगमा दावी गर्ने बताउनुभएको छ ।

बिहीबार अपरान्ह विराटनगर पुग्नुभएका वरिष्ठ नेता खनालले कानून बमोजिम निर्वाचन आयोगमा पार्टीले आधिकारिकता दावी गर्ने बताउनुभएको हो ।

नेकपाका दुई तिहाई केन्द्रीय सदस्यहरु भएको पार्टी नै आधिकारिक भएको दावी गर्दै उहाँले आवश्यक परेमा राजनीतिक दल सम्बन्धी ऐनको दफा ४४ बमोजिम आधिकारिकताको दावी गर्ने उहाँको भनाई थियो ।

निर्वाचन आयोगले नेकपा भित्रको विवाद टुंगो नलगाई निर्वाचन प्रकृया सुरु गरेको विषयमा सोधिएको प्रश्नमा नेता खनालले आयोगले आफ्नो काम गर्ने र पार्टीले आफ्नै काम गर्ने बताउनुभयो ।

नेपालको संविधानले मध्यावधि निर्वाचनको कल्पना नगरेको भन्दै वरिष्ठ नेता खनालले भन्नुभयो ‘नेपालमा आवधिक चुनाव मात्र हुन्छ । मध्यावधि भन्ने नै हुँदैन । अन्तराष्ट्रिय परम्परा पनि आवधिक निर्वाचन गर्ने नै हो । बेलायतमा पनि अहिले संसद विघटन गरेर मध्यावधि निर्वाचन गर्ने अधिकार प्रधानमन्त्रीलाई दिइएको छैन, क्यानडामा पनि छैन । त्यसैले यो अन्तराष्ट्रिय परम्परा पनि होइन । नेपालमा पनि प्रधानमन्त्रीले संसद विघटन गरेर मध्यावधि चुनाव गर्ने अधिकार संविधानले दिएको छैन ।’ उहाँले संसद विघटन संसदले चाहेमा भने गर्न सक्ने अन्तराष्ट्रिय अभ्यास रहेको बताउनुभयो ।

अहिले निर्वाचनमा जानु भनेको तानाशाही व्यवस्था लाद्नका लागि उनीहरुको कदममा ठप्पा लगाउनु झैं हुने उहाँको भनाई थियो । जनताको आन्दोलनबाट देशमा गणतन्त्र, संघीयता, समावेशीता, संविधान प्राप्त भएकोमा प्रधानमन्त्रीले ती सबैलाई ध्वंश गर्ने प्रयत्न गरेको उहाँको आरोप थियो । नेपाली जनताले ध्वंश गर्ने ओलीको प्रयत्नलाई रोक्ने उहाँको भनाई थियो । नेकपा विभाजन नभई मिल्नसक्ने सम्भावना सुन्य भएको भन्दै उहाँले इतिहासमा कोपी ओली भष्मासुर र धुन्धुकारीको रुपमा जन्मिएको आरोप पनि लगाउनुभयो ।

नेपाली नजताले राष्ट्रको पक्षमा, सार्वभौमसत्ता र अखण्डताको पक्षमा निरन्तर आन्दोलन गर्नुपर्ने भन्दै उहाँले समाजवाद स्थापना भएपछि पनि यी सवालहरुमा संघर्ष जारी रहने उहाँको भनाई थियो ।

प्रदेश १ प्र्रदेशसभामा अविश्वासको प्रस्ताव दर्ता भएको सन्दर्भमा उहााले लोकतन्त्रका, संविधान, र स्वतन्त्रताको पक्षमा भएका सबैसँग मिलेर अघि बढ्ने बताउनुभयो ।

उहाँले नेकपालाई बैचारिक, संगठनानात्मक रुपले सुदृढ गर्दै समाजवादको दिशामा अगाडि लैजाने भन्दै जनताको भविष्य सुनिश्चित नभएसम्म संघर्ष गरिरहने बताउनुभयो । उहाँले अहिलेको आन्दोलन नेपाली जनतालाई प्रधानमन्त्रीले गरेको गलत कदमका विषयमा बुझाउन र सार्वभौम सत्ता जनताको हातमा छ भन्ने जानकारी गराउन भएको जिकिर गर्नुभयो । आनदोलनलाई अदालतमा विचाराधीन मुद्दा प्रभावित गर्ने अर्थमा बुझ्न नहुने भन्दै प्रतिनिधि सभा पुनसर््थापना अनिर्वाच हुने समेत बताउनुभयो । ‘अदालतले संविधान बमोजिम फैसला गर्छ,’ नेता खनालले भन्नुभयो ‘संविधानमा संसद विघटन गर्ने विशेष अधिकार प्रधानमन्त्रीलाई दिएको छैन त्यसैले पुनसर््थापना हुन्छ ।’