विराटनगर। नेपालमा कोरोना भाइरसबाट संक्रमित तेस्रो व्यक्ति धादिङका ३२ वर्षीय पुरुष रहेको खुलेको छ ।
गत चैत ६ गते कतारबाट नेपाल आएका उनी काठमाडौंस्थित एक होटलमा रहेको बेला असहज महशुस गरेपछि अस्पताल आएको स्वास्थ्य तथा जनसंख्यामन्त्री भानुभक्त ढकालले जानकारी दिनुभयो ।
स्वास्थ्य असहज भएपछि मंगलबार टेकुस्थित शुक्रराज ट्रपिकल तथा सरुवा रोग अस्पतालमा पुगेका उनको परीक्षणमा पोजेटिभ पाइएको बुधबार अस्पतालले सार्वजनिक गरेको हो । प्रयोगशालाका सूचना अधिकारी राजेशकुमार गुप्ताका अनुसार थप एक व्यक्तिको रिपोर्टमा पोजेटिभ देखिएको छ ।
उनको टेकु अस्पतालकै आइसेलोसनमा उपचार भइरहेको छ। यसअघि संक्रमित पहिलो व्यक्ति उपचारपछि घर गइसकेको र एकजना उपचारको क्रममा रहेको बेला अर्को एकजनामा कोरोना संक्रमण देखिएको हो ।
नेपालमा अहिलेसम्म ६८७ जनाको नमुना परीक्षण गरिएको छ, जसमध्ये ६८४ को रिपोर्ट नेगेटिभ आएको छ । सुरुमा चीनबाट आएका एक विद्यार्थीमा कोरोना संक्रमण देखिएको थियो । उनी उपचारपछि निको भइसकेका छन् ।
चैत ४ मा फ्रान्सबाट कतारको दोहा हुँदै नेपाल आएकी १९ वर्षीया युवतीमा पनि संक्रमण देखिएको थियो । आइतबार उनमा संक्रमण पुष्टि भएपछि सरकारले लकडाउनको घोषणा गरेको थियो ।
