विराटनगर । बहुआयमिक स्वास्थ्य उपचार दिने प्रचार गर्दै आएको विराटनगरको जनआन्दोलन चोकस्थित पारस हस्पिटल पाँच महिनादेखि नविकरणविना सञ्चालनमा रहेको पाइएको छ ।
हस्पिटलको नविकरणको म्याद सकिएको पाँच महिना हुनलाग्दा पनि हस्पिटल नविकरण भएको छैन । ५० शय्याको अस्पतालको नविकरणको म्याद २०८० को पुस ९ गते सकिएको छ । म्याद सकिएपछि संस्था नविकरण गर्नुपर्ने स्वास्थ्य संस्था स्थापना, सञ्चालन तथा स्तरोन्नति मापदण्ड सम्बन्धी निर्देशिका २०७० मा उल्लेख छ । तर, पारस हस्पिटलले अटेरी गर्दै नविकरण गर्ने चासो देखाएको छैन । स्वास्थ्य निर्देशिकामा तोकिएको समय अवधिभित्र दर्ता नगरे दोब्बर दस्तुर लाग्ने र त्यसपछि पनि नविकरण नगर्ने स्वास्थ्य संस्थाको अनुमति खारेज हुने व्यवस्था रहेको छ ।
निर्देशिका अनुसार ५० शय्यासम्मको अस्पताल नविकरण स्वास्थ्य मन्त्रालय अन्तर्गतको स्वास्थ्य निर्देशनालय धनकुटामा हुन्छ । नविकरण सकिएको पाँच महिना हुन लाग्दा पनि पारस हस्पिटलको नविकरणको प्रक्रिया पुरा नभएको स्वास्थ्य निर्देशानलयका छानविन अधिकारी सुरेन्द्र बजिमायाले जानकारी दिए ।
केही प्रक्रिया पुरा नभएकोले पारस अस्पतालको नविकरणमा ढिलाइ भएको उनले बताए । ‘अस्पतालहरुले नविकरणको म्याद सकिएको तीन महिनाभित्रमा नविकरण गरिसक्नु पर्दछ,’ उनले भने, ‘समयसीमा भित्र नविकरण नहुने अस्पताललाई जरिवना लाग्छ । त्यसपछि पनि नविकरणमा चासो नदेखाएको हस्पिटललाई स्वास्थ्य निर्देशिका अनुसार कारवाहीको प्रक्रिया अगाडि बढछ ।’ अस्पतालले नविकरणमा ढिलाइ गरेपछि केही दिन अगाडि निर्देशानालयले निरीक्षण पनि गरेको छ । त्यस क्रममा गरेको अनुगमनको प्रतिवेदन आउने क्रममा रहेको निर्देशनालयले जनाएको छ ।
हस्पिटलविरुद्ध अख्तियारमा पनि उजुरी
विशिष्टकृत सेवा सुरु गरेको भन्दै अख्तियार दुरुपयोग अनुसन्धान आयोगकको कार्यालयमा पारस हस्पिटल विरुद्ध उजुरी पनि परेको छ । विशिष्टकृत अस्पतालको स्वीकृत संघीय सरकारको स्वास्थ्य तथा जनसंख्या मन्त्रालयले मात्र दिने गर्दछ । त्यो पनि विशष्टिकृत अस्पतालको लागि छुट्टै विभाग हुनुपर्दछ ।
पारस अस्पतालले विशिष्टकृत सेवा दिने भन्दै विरामी ठगी गरेको उजुरी अख्यितारमा परेको हो । अख्तियारमा उजुरी परेपछि निरीक्षणको लागि स्वास्थ्य मन्त्रालय कोशी प्रदेशमा अख्तियारले पत्रसमेत पठाएको पाइएको छ । स्वास्थ्य मन्त्रालयमा अख्तियारबाट पत्र आएपछि स्वास्थ्य मन्त्रालयका कर्मचारीले अस्पतालको निरीक्षण गरेका थिए । निरीक्षणपछि मन्त्रालयले प्रतिवेदन अख्तियार पठाउने पनि तयारी गरेको छ ।
पारस अस्पतालका प्रशासन हेर्ने हेमनारायण मेहतालाई अस्पताल नविकरण नभएको र अख्तियारमा परेको उजुरी विषयमा बुझ्न खोज्दा उनी सम्पर्कमा नै आउन चाहेनन् ।
