विराटनगर । कोशी प्रदेशको मुख्यमन्त्री केदार कार्कीले आज विस्तार गरेको मन्त्रीमण्डलप्रति नेकपा (एकीकृत समाजवादी)ले असन्तुष्टि जनाएको छ । उसले मुख्यमन्त्री विगतको सहमतिबाट पछि हटेको भन्दै नसच्चिए विकल्प सोच्ने चेतावनी समेत दिएका छन् ।
प्रदेशका मुख्यमन्त्री केदार कार्कीले आज चार जना मन्त्री तथा दुई जना राज्यमन्त्री थप गर्दै मन्त्रीमण्डलको संख्या १० पुर्याएका थिए । जसमा काँग्रेसका २ मन्त्री तथा २ राज्यमन्त्री र माओवादी केन्द्रबाट २ जना मन्त्री नियुक्त भएका छन् । नेकपा (एकीकृत समाजवादी) कोशी प्रदेश संसदीय दलका नेता राजेन्द्र राईले भने आफूहरुलाई थप एक मन्त्रालय दिने सहमति मुख्यमन्त्रीले उल्लंघन गरेको बताए ।
‘उहाँले हामीलाई थप मन्त्रालय दिने भन्नुभएको थियो । काँग्रेसले मन्त्रालय थप नपाउने तर, मन्त्री मात्रै थप्ने भन्ने सहमति यसअघि नै भएको थियो । तर, मन्त्रीमण्डल बनाउँदा उहाँले त्यो सहमति उल्लंघन गर्नुभयो,’ राईले भने ।
उनले मुख्यमन्त्रीले कदम नसच्याए विभिन्न विकल्पमा जाने पनि बताए । ‘उहाँलाई हामीले अहिलेको कदम सच्याउन भनेका छौं । नसच्याएको खण्डमा हामी सरकारलाई दिएको समर्थन फिर्ता लिने, मन्त्रीलाई फिर्ता बोलाउने । अर्को सरकार बनाउने । गठबन्धन परिवर्तन गर्ने । आफैं मुख्यमन्त्री बन्नेसम्मका विकल्पमा जान सक्छौं,’ राईले भने । मुख्यमन्त्री कार्कीले सहमति विपरीत अध्यादेश ल्याएको पनि राईले बताए । ‘अध्यादेश विना सल्लाह ल्याउनु भयो । एउटा मन्त्रीका लागि सरकारमा टाँसिरहन कुनै जरुरी छैन,’ उनले भने ।
मुख्यमन्त्री कार्कीले आफू नियुक्त भएको चार महिना पुग्नलाग्दा सरकार विस्तार गरेका हुन् । जसमा स्वास्थ्य मन्त्रालयमा प्रदिपकुमार सुनुवार, उद्योग कृषि तथा सहकारी मन्त्रीमा रामकुमार खत्री, खानेपानी, सिंचाई तथा उर्जा मन्त्रालयमा नारायण बुर्जा मगर, सामाजिक विकास मन्त्रीमा राजेन्द्र कार्की, आर्थिक मामिला तथा योजना मन्त्रालय राज्यमन्त्रीमा इन्दिरा थापा र आन्तरिक मामिला तथा कानून मन्त्रालयको राज्यमन्त्रीमा सुनिताकुमारी गुरुङ (राम) रहेका छन् ।
मुख्यमन्त्री कार्कीले आर्थिक मामिला तथा योजना मन्त्रालयको पूर्ण जिम्मेवारी भने आफैंले राखेका छन् । नवनियुक्त मन्त्रीहरु सुनुवार, खत्री, राज्यमन्त्रीद्वय थापा र राम काँग्रेसका हुन् । उनीहरुमध्ये सुनुवार मात्रै काँग्रेस संस्थापन पक्षका हुन् भने अन्य तीन जना कार्कीलाई मुख्यमन्त्री बनाउनका लागि विद्रोह गर्ने ८ सांसदमध्येकै हुन् ।
यस्तै माओवादीबाट भने राजेन्द्र कार्की र मगर मन्त्री नियुक्त भएका हुन् । बरियतामा मुख्यमन्त्रीपछि प्रदिपकुमार सुनुवार, राजेन्द्र कार्की, शमशेर राई, गणेशप्रसाद उप्रेती, कमल प्रसाद जबेगू, रामकुमार खत्री, नारायण बहादुर मगर, इन्दिरा थापा र सुनिताकुमारी गुरुङ (राम) रहेका छन् । गुरुङ दलित कोटाबाट समानुपातिक सांसद बनेकी हुन् ।
यसअघि कार्कीले काँग्रेसबाट शमशेर राई, माओवादीबाट गणेशप्रसाद उप्रेती र नेकपा (एकीकृत समाजवादी)बाट कमल प्रसाद जबेगूलाई नियुक्त गरिसकेका छन् । जसमध्ये राईलाई आन्तरिक मामिला तथा कानून, उप्रेतीलाई पर्यटन, वन तथा वातावरण र जबेगूलाई भौतिक पूर्वाधार विकास मन्त्रीको जिम्मेवारी सम्हालिरहेका छन् । कार्की गत असोज २७ गते संविधानको धारा १६८ को उपधारा (५) अनुसार मुख्यमन्त्रीमा नियुक्त भएका हुन् ।
