विराटनगर । विराटनगरको अन्तर्राष्ट्रिय कृष्णभावनामृत संघ (इस्कोन)ले श्रीमद् भागवत् सप्ताहको आयोजना गर्ने भएको छ ।
इस्कोन विराटनगरले आउँदो मंसिर १ गतेदेखि ७ गतेसम्म भागवत सप्ताहको आयोजना गर्न लागेको हो । श्रीमद् महाभागवत विराटनगरको तीनपैनी स्थित खाटु श्याम मन्दिरमा हुने भएको छ । मंगलबार पत्रकार सम्मेलन गरी सम्पूर्ण परिवारको कल्याण तथा सम्पूर्ण पितृको उद्धारका लागि पुराण गर्न लागिएको आयोजक समिति इस्कोन विराटनगरका सचिव भानुभक्त जोसीले जानकारी दिए ।
श्रीमद् महाभागवत् कथा वाचकका रुपमा अन्तर्राष्ट्रिय कृष्णभावनामृत संघ (इस्कोन) का आध्यात्मिक भागवत् वक्ता श्रद्धेय लाल गोविन्द प्रभुजी आउने उनले जानकारी दिए । उनले हिन्दी भाषाद्वारा सरल र सुन्दर शैलीमा भागवत् कथा वाचन गर्नेछन् । पेशाले सफ्टवेयर कम्प्युटर इन्जिनियर भएपनि उनी आफ्नो गहिरा र प्रेरणादायक प्रवचनहरुले देश तथा विदेशमा परिचित छन् ।
विराटनगर–२ स्थित तीनपैनीको श्याम मन्दिरको हलमा प्रत्येक दिन दिनको ३ बजेदेखि ७ बजेसम्म श्रीमद् महाभागवत कथा वाचन हुनेछ । इस्कोन विराटनगरले भागवत कथालाई भव्य रुपमा सम्पन्न गर्न डा. राहुल सरावगीलाई संयोजकको जिम्मेवारी दिएको छ । भागवत् कथामा अन्तराष्ट्रिय संगीतकार टोली उपस्थिति रहने, सांस्कृतिक कार्यक्रम हुने साथै कथा श्रवणमा आउने सम्पूर्ण भक्तजनहरुलाई प्रसाद वितरण गरिने सचिव जोशी जानकारी दिए ।
