काठमाडौँ ।प्रधानमन्त्री सुशीला कार्कीले हालै सम्पन्न प्रतिनिधिसभा निर्वाचनलाई सफलतापूर्वक सम्पन्न गर्न सहयोगी भूमिका निर्वाह गरेको भन्दै नेपाल कम्युनिष्ट पार्टी (नेकपा) का नेताहरूलाई धन्यवाद व्यक्त गरेकी छन् । मंगलबार प्रधानमन्त्रीको निमन्त्रणामा बालुवाटार पुगेका नेकपाका शीर्ष नेताहरूसँगको भेटमा उनले नवनिर्वाचित प्रतिनिधिहरूलाई बधाई समेत दिएकी छन् ।
भेटवार्तामा नेकपाका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’, पूर्वप्रधानमन्त्री माधवकुमार नेपाल, नेताहरू नारायणकाजी श्रेष्ठ र वर्षमान पुन लगायतको सहभागिता थियो । प्रधानमन्त्रीका प्रेस सल्लाहकार रामबहादुर रावलका अनुसार भेटमा निर्वाचनपछिको समसामयिक राजनीतिक अवस्था र भावी कार्यदिशाका बारेमा छलफल भएको थियो ।
प्रधानमन्त्री कार्कीले निर्वाचनको पक्षमा सकारात्मक वातावरण बनाउन नेकपाले खेलेको भूमिकाको प्रशंसा गर्दै भनिन्, ‘तपाईंहरूले निर्वाचनमा भाग लिनुभयो र मुलुकलाई शान्तिपूर्ण एवं लोकतान्त्रिक विधिबाट निकास दिन सहयोगी भूमिका निर्वाह गर्नुभयो । यसका निम्ति म सबैलाई धन्यवाद दिन्छु । साथै, निर्वाचित प्रतिनिधिसभा सदस्यहरूलाई बधाई तथा सफल कार्यकालको शुभकामना छ ।’
भेटका क्रममा नेकपाका संयोजक प्रचण्डले प्रधानमन्त्रीको दृढता र इमानको प्रशंसा गर्दै समयमै निर्वाचन नभएको भए मुलुक संकटमा पर्ने बताए । प्रचण्डले भने, ‘यो निर्वाचन नभएको भए मुलुक अर्को ठूलो दुर्घटनामा जान सक्ने सम्भावना थियो । निकै चुनौतीपूर्ण र अस्तव्यस्त अवस्थामा पनि तपाईंले जुन साहस र मेहनतका साथ ६ महिनाभित्रै चुनाव गराउनुभयो, यो निकै महत्त्वपूर्ण र प्रशंसालायक छ । उनले आफ्नो पार्टी सुरुदेखि नै निर्वाचनको पक्षमा उभिएको र लोकतन्त्रको सुदृढीकरणका लागि प्रतिबद्ध रहेको समेत स्मरण गराए ।
अस्तव्यस्त अवस्थामा रहेको मुलुकलाई सम्हालेर छोटो समयमै निर्वाचन सम्पन्न गराउनु प्रधानमन्त्री कार्कीको स्वच्छ छवि र दृढ संकल्पका कारण सम्भव भएको नेताहरूको भनाइ थियो । यसअघि प्रधानमन्त्री कार्कीले नेकपा (एमाले) लगायतका विभिन्न राजनीतिक दलका नेताहरूसँग पनि भेट गरी निर्वाचन सफल बनाउन सहयोग गरेकोमा आभार प्रकट गरिसकेकी छन् ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।