विराटनगर । कोशी प्रदेशमा मनसुनजन्य विपद्का कारण ठूलो जनधनको क्षति भएको छ । कोशी प्रदेश प्रहरी कार्यालयले सार्वजनिक गरेको पछिल्लो तथ्याङ्कअनुसार बाढी र पहिरोमा परी हालसम्म ४३ जनाले ज्यान गुमाएका छन् भने दशौं हजार मानिस विस्थापित भएका छन् ।
प्रहरीका अनुसार बाढी–पहिरोमा परी मृत्यु हुनेमा १८ जना पुरुष र २५ जना महिला रहेका छन् । विपद्बाट सबैभन्दा बढी इलाम प्रभावित भएको छ । इलाममा मात्रै ३७ जनाको मृत्यु भएको छ । जसमा १३ पुरुष, १४ महिला, ३ बालक र ७ बालिका रहेका छन् । त्यसैगरी, पाँचथर र मोरङमा २–२ जना, उदयपुरमा २ जना र खोटाङमा ३ जनाको मृत्यु भएको तथ्याङ्कमा उल्लेख छ ।
विपद्का घटनामा परी प्रदेशभरी १० जना घाइते भएका छन् । घाइते हुनेमा ५ पुरुष र ५ महिला छन् । पाँचथर, खोटाङ र भोजपुरमा घाइतेको संख्या बढी छ । तथ्याङ्कअनुसार प्रदेशमा केही व्यक्ति बेपत्ता समेत भएका छन् । जसमा इलाममा १ जना रहेको छ ।
बाढी र पहिरोले भौतिक संरचनामा पनि ठूलो क्षति पु¥याएको छ । प्रदेश प्रहरी कार्यालयका अनुसार हालसम्म ५ हजार ९२५ घरका २६ हजार ९८४ जना विस्थापित भएका छन् । विस्थापितहरूका लागि उद्धार तथा राहतको कार्य जारी रहेको छ । विपद्का घटनामा फसेका ५३२ जनाको सकुशल उद्धार गरिएको प्रहरीले जनाएको छ । घर क्षतिको विवरणअनुसार १६ वटा घर पूर्ण रूपमा ध्वस्त भएका छन् । जसमा इलाममा १४ र पाँचथरमा २ घर रहेका छन् ।
