विराटनगर । मोरङको उर्लाबारी नगरपालिका–२ डुम्रेकी मनमाया थापा मगरले ७३ वर्षको उमेरमा नागरिकता प्राप्त गर्नुभएको छ ।
कपाल सतै फुलेर अनुहार चाउरी भइसक्दा पनि वृद्धाले नागरिकता नपाएको समचार हाम्रोमतसहित सञ्चारमाध्यमहरुमा आएपछि उर्लाबारी २ का वडाअध्यक्ष राजनकुमार कँडेलको पहलमा वृद्धाले नागरिकता प्राप्त गर्नुभएको हो ।
वृद्धा उमेरमा नागरिकता पाएपछि उनी हर्षित छन् । ‘वर्षौदेखिको सपना अहिले आएर साकार भयो,’ नागरिकता पाएपछि टेलिफोन सम्र्पकमा मनमायाले भन्नुभयो, ‘वृद्धा उमेरमा राज्यले पहिचान गराइदिएको छ । मर्ने बेलामा नागरिता पाएर मर्ने इच्छा थियो । त्यो इच्छा अहिले आएर पूरा भयो ।’ उहाँले नागरिकता बनाउन पहल गरिदिने सबैलाई धन्यवाद दिनुभयो ।
नागरिकता बनाउन प्रशासन कार्यालयमा धेरै पटक धाएपछि बसाइसराइ नभएको र माइती पक्षको आफन्तको नागरिकता नभएको भन्दै नागरिकताबाट बञ्चित गरिएको थियो । विगतमा पाएको दुःखेसो सुनाउँदै उहाँले भन्निुभयो, ‘अहिले स्थानिय सरकार भएको अनुभति भयो । यो अवस्था भएर नागरिता पाए । साह्रै खुसी भएको छु ।’
मनमाया ७७ वर्षीय श्रीमान पदमबहादुर मगर र जेठी छोरीको साथमा बसोवास गर्दै आउनुभएको छ । आर्थिक अवस्था नाजुक रहेको वृद्धा दम्पतीलाई नागरिकता पाएपछि राज्यले दिने वृद्धभत्ताबाट गुजारा चलाउन र औषधी उपचारमा केही सहज हुनेछ ।
उर्लाबारी नगरपालिका २ का वडाअध्यक्ष कँडेलले आफ्नो वडाभित्र बसोवास गर्ने कोही पनि नागरिकलाई नागरिकताबिहीन हुन नदिने बताउनुभयो । उहाँले यसअघि पनि वडाभित्रका एक जना वृद्धाको नागरिकता दिलाइदिएको जानकारी दिनुभयो । ‘नेपालमै जन्मेर पनि राज्यले प्रदान गर्दै आएको सेवा सुविधाबाट वडाभित्रका कसैलाई पनि बन्चित हुन दिने छैन,’ वडाअध्यक्ष कँडेलले भन्नुभयो, ‘स्थानीय सरकार भएको जनतालाई अनुभुति दिलाउन यसरी सधैभरी लागि पर्नेछु ।’
