भारतीय बजार जानेलाई दुई साता क्वारेन्टिनमा राखिने

विराटनगर । महामारीको रूपमा फैलिएको कारोना भाइरसको रोकथाम र नियन्त्रणको लागि नेपाल–भारको सीमा नाका शिल गरिएको भएपनि सुरक्षाकर्मीको आँखा छलेर विराटनगरको सिमावर्ती बजार जोगवनी जाने क्रममा रोकिएको छैन । उपभोक्ताहरु दैनिक उपभोग्य वस्तुदेखि विभिन्न सामाग्री खरिद गर्न जोगवनी जाने गरेका छन् ।

भारतमा कोरोना संक्रमणको दर व्यापक बनिरहेको बेला भारतीय बजार जानेप्रति प्रहरीले थप कडाई गर्ने भएको छ । प्रहरीको आँखा छलेर भारतीय बजार गएर नेपाल प्रवेश गर्नेलाई सुरक्षामा खटिएका प्रहरीले नियन्त्रणमा लिएर क्वारेन्टिनमा लगेर राख्न थालेका छन् ।

प्रदेश १ को चार वटा नाका अनुमति लिएर नेपाल प्रवेश गर्ने बाहेक अन्यलाई प्रहरीले क्वारेन्टिनमा राख्न थालेको हो । प्रदेश १ को अहिले मोरङको जोगवनी, सुनसरीको भान्टावरी, झापाको काँकडभिट्टा र इलामको पशुपती नगर नाका बाहेक अन्यत्रबाट आवतजावतमा पूर्ण रुपमा रोक लगाइएको छ । यी नाका प्रयोग गर्दा पनि स्थानीय प्रशासनको अनुमति चाहिन्छ ।

सरकारले तोकेको नाकाबाहेक अन्यत्रबाट सुरक्षार्कीको आँखा छल्दै आवतजावत गर्नेलाई दुई साता क्वारेन्टिनमा राख्न सुरू गरेको मोरङका प्रमुख जिल्ला अधिकारी कोषहरि निरौलाले जानकारी दिनुभयो । भारतसँग सीमा जोडिएको मोरङको ६३ किलोमिटर क्षेत्रमा साना–ठूला ३६ वटा नाका रहेको छ । चाडपर्व नजिकिएसँगै दैनिक उपभोग्य सामान खरिद गर्न उपभोक्ताहरू भारतीय सिमावर्ती बजार जाने क्रममा बढेपछि प्रशासनले कडाइ गरेको हो ।

‘सीमा नाका बन्द गरिएको अवस्थामा भारतीय बजार जानहरूलाई सुरक्षामा खटिएको सुरक्षाकर्मीले पक्राउ गर्न थालेका छन्’ प्रजिअ निरौलाले भन्नुभयो, ‘प्रहरीको आँखा छलेर कतैबाट भारत गएर नेपाल फर्किएकोे फेला पारे पक्राउ गरेर २ साता क्वारेन्टिनमा राखिन्छ । क्वारेन्टिनमा दुई साता राखेपछि पीसिआर परीक्षण गरेर रिपोर्ट नेभेटिभ आए मात्र घर जान दिने प्रशासनले जनाएको छ ।

इस्लामपुरको सिमा नाकामा भागाभाग
भारतीय बजारमा गएर नेपाल प्रवेश गर्नेहरूलाई सशस्त्र प्रहरीले पक्राउ गरी क्वारन्टिनमा लैजान प्रहरीको वानटेन गाडी सिमा नाका विराटनगर १७ इश्लामपुरमा राखेपछि भागाभाग भएको छ । बुधबार इश्लामपुरको नाका हुँदै विराटनगरदेखि पूर्वको विभिन्न सहरका उपभोक्ताहरू सिमावर्ती भारतीय बजार जोगवनी गएका थिए । चोरबाटो हुदै गएर फर्किनेहरूलाई क्वारेन्टिनमा लैजान सशस्त्र प्रहरी बल बिओपी रानीले इस्लामपुर नाकामा गाडी राखेको थियो ।

प्रहरीले क्वारेन्टिनमा लगेर दुई साता राख्ने गरेको चाल पाएपछि भारतीय बजार गएकाकाहरूको भागाभाग चल्यो । चोरबाटो हुँदै लुकीछुपी भारतीय बजार गएकालाई नियन्त्रणमा लिएर क्वारेन्टिनमा राख्न सशस्त्र प्रहरी बल बिओपी रानी विराटनगरका सशस्त्र प्रहरीका इन्सिपेक्टर मौसम पोखरेलको नेतृत्वको टोली परिचालन भएको थियो ।

‘करिब २ सयको संख्यामा भारतीय बजार गएका नेपालीहरू सीमा नाका इलास्मपुरमा जम्मा भएका थिए । सशस्त्र प्रहरीले क्वारेन्टिनमा लैजान ठूलो वानटेन गाडी सिमा नाकामा राखेपछि जम्मा भएकाहरूको भागदौड भयो,’ सिमा नाकाका एक प्रत्यक्षदर्शीले भने, ‘कोही भारतर्फ नै भागे । कोही नेपाल छिरे । कतिको खरिद गरेको सामान भागदौडमा भारत–नेपालको सिमा नाका इस्लामपुरको खोलाले बगायो ।’ प्रहरीले कडाइ गरेपछि सीमाबाट वारपार कम हुने विश्वास लिइएको छ ।

फोटो क्याप्सनः भारतीय बजारमा सामान खरिद गरेर विराटनगर १७ इश्लामपुर नाका जम्मा भएकाहरू