काठमाडौं । ऊर्जा, जलश्रोत तथा सिंचाइ मन्त्रालयले कुलमान घिसिङलाई नेपाल विद्युत प्राधिकरणको कार्यकारी निर्देशकमा पुनः नियुक्तिको लागि मन्त्रिपरिषदमा प्रस्ताव लगिसकेको जनाएको छ ।
उर्जामन्त्री वर्षमान पुन ‘अनन्त’को सचिवालयले घिसिङलाई पुनः चार वर्षे कार्यकालका लागि नेपाल विद्युत प्राधिकरणको कार्यकारी निर्देशक नियुक्त गर्न प्रस्ताव लगिसकेको स्पष्ट पारेको हो ।
मन्त्री पुनका प्रमुख स्वकीय सचिब दुर्गाप्रसाद चापागाईंले बिहीबार सामाजिक सञ्जाल फेसबुकमार्फत सोमबारको मन्त्रिपरिषद बैठकमा मन्त्री पुनले घिसिङलाई पुनः प्राधिकरणको कार्यकारी निर्देशकमा नियुक्तिका लागि प्रस्ताव पेश गरेको जानकारी दिनुभएको हो । चापागाईंले मन्त्रिपरिषदले प्राधिकरणको आवश्यकता र जनभावनाको कदर गर्दै मन्त्रिपरिषदले घिसिङलाई कार्यकारी निर्देशकको जिम्मेवारी दिने विश्वाससमेत व्यक्त गर्नुभएको छ ।
‘नेपाल विद्युत प्राधिकरणको कार्यकारी निर्देशक नियुक्तिका सन्दर्भमा ऊर्जा, जलश्रोत तथा सिंचाइमन्त्री माननीय वर्षमान पुन अनन्तज्यूले गत सोमबारको मन्त्रिपरिषद बैठकमा कुलमान घिसिङलाई आगामी चार वर्षका लागि कार्यकारी निर्देशक नियुक्ति गर्न प्रस्ताव पेश गर्नुभएको र हाल उक्त प्रस्ताव प्रधानमन्त्री तथा मन्त्रिपरिषद कार्यालयमा विचाराधीन अवस्थामा रहेको छ’, चापागाईंले भन्नुभएको ‘अतः प्राधिकरणको आवश्यकता र आम जनचाहनालाई मध्यनजर गर्दै मन्त्रिपरिषदले उक्त प्रस्तावमाथि छिट्टै निर्णय गर्ने आशा गर्दछु ।’
चापागाईंले मन्त्री पुनले प्रधानमन्त्री केपी शर्मा ओली र नेकपाका कार्यकारी अध्यक्ष पुष्पकमल दाहाल प्रचण्डसँग परामर्श गरेरै घिसिङको मात्र नाम मन्त्रिपरिषदमा प्रस्ताव गरिएको स्पष्ट पार्नुभएको छ । गत २८ भदौमा कार्यकारी निर्देशकका रुपमा चार वर्षे कार्यकाल सकिएको घिसिङलाई नियुक्त गर्ने प्रस्ताव मन्त्रिपरिषदमा पुगेपनि प्रधानमन्त्रीले कानून बुझ्नुपर्ने भनेपछि निर्णय हुन सकेको छैन ।
लोडसेडिङ अन्त्य र विद्युत प्राधिकरणलाई नाफामा लगेर चर्चित बनेका घिसिङको पुनः नियुक्तिको निर्णय सोमबार हुने अपेक्षा गरिएको थियो । तर, प्रधानमन्त्रीले कानून बुझ्नुपर्ने भन्दै पन्छाएपछि प्राधिकरणले सोमबार उहाँको औपचारिक बिदाई गरेको छ ।
