एमालेमा याेगेश, विशाल, यज्ञराज, तुलसी, विनाेद, राजेन्द्र र अग्नि आउट ! भानुभक्त तेह्थुम टाप, भगवतीलाई सुनसरी ४ पठाईयाे

विराटनगर । आसन्न प्रतिनिधिसभा निर्वाचनका लागि नेकपा एमालेले कोशी प्रदेशका १४ वटै जिल्लाका उम्मेदवारहरूको प्रारम्भिक सूची तयार पारेको छ।

एमालेको बलियो जनाधार मानिने कोशी प्रदेशमा पार्टी अध्यक्ष केपी शर्मा ओलीसहित पूर्वमुख्यमन्त्री र प्रभावशाली नेताहरूको टिकट पक्का भएको छ भने तराईका झापा, मोरङ र सुनसरीका केही क्षेत्रहरूको निर्णय अध्यक्ष ओलीकै जिम्मामा छोडिएको छ।

विवरण अनुसार झापा क्षेत्र नम्बर ५ बाट अध्यक्ष ओली नै चुनावी मैदानमा उत्रिने निश्चित भएको छ। झापाका अन्य क्षेत्रहरूमध्ये क्षेत्र नम्बर १ मा रामचन्द्र उप्रेती, २ मा देवराज घिमिरे र ४ मा मनोज ताम्लीको नाम टुंगो लागेको छ भने क्षेत्र नम्बर ३ को निर्णय अध्यक्षले गर्नेछन्। क्षेत्र नम्बर ३ मा एमालेले यसअघि राप्रपा अध्यक्ष राजेन्द्र लिङ्देनलाई सघाउँदै आएकाे थियाे । यसपटक पनि अध्यक्ष ओलीले आफू झापा ५ मा सुरक्षित रहन राप्रपासँग सहकार्य गर्न त्यसाे गरिएकाे हुनसक्ने जनाईएकाे छ ।

एमालेले झापा २ का आकांक्षी नेता अग्नी खरेललाई यश पटक पनि टिकटबाट वञ्चित गरेका छन् । एमालेले झापामा टिकट दिएकामध्ये उप्रेती र ताम्ली नयाँ अनुहार हुन् ।

प्रदेशको सबैभन्दा धेरै निर्वाचन क्षेत्र भएको मोरङ जिल्लामा पनि एमालेले ५ र ६ नम्बर क्षेत्रबाहेक अन्यमा उम्मेदवारको टुंगो लगाएको छ। मोरङ क्षेत्र नम्बर १ मा घनश्याम खतिवडा, २ मा दिलीप बगडिया, ३ मा दिलीप राई र ४ मा जीवन घिमिरेले एमालेको तर्फबाट प्रतिस्पर्धा गर्नेछन्। खतिवडा एमाले प्रदेश अध्यक्ष हुन् । उनी याे क्षेत्रबाट ४८ सालयता लगातार प्रतिस्पर्धा गरिरहेका छन् । उता २ नम्बरका उम्मेदवार बगडिया रंगेली नगरपालिकाका प्रमुख हुन् । साे क्षेत्रमा एमाले नेता ऋषिकेश पाेखरेलले चुनाव लड्दै आएका थिए । यसपटक उनकाे नाम काटेर बगडियालाई अघि सारिएकाे हाे ।

क्षेत्र नम्बर ३ का उम्मेदवार दिलिप राई र ४ का जीवन घिमिरे यसअघि प्रदेशसभामा पराजित बनेका थिए । प्रतिनिधिसभामा उनीहरूकाे प्रतिस्पर्धा पहिलाे हुनेछ ।
मोरङको क्षेत्र नम्बर ५ र ६ मा भने उम्मेदवारको नाम सार्वजनिक गरिएको छैन । यी दुवै क्षेत्रको निर्णय अध्यक्षले गर्ने गरी खाली राखिएको छ। क्षेत्र नम्बर ५ मा एमालेले राष्ट्रिय उर्जाशिल पार्टीका संयाेजक याेगि मण्डललाई सहयाेग गर्नसक्ने अनुमान छ । यस्तै माेरङ ६ मा नेता विनाेद ढकाल, लालबाबु पण्डित र सत्चयनारायण चाैधरीकाे चर्चा थियाे ।

उता सुनसरीमा क्षेत्र नम्बर १ बाट सूर्य पन्दाक र ४ बाट भगवती चौधरीको नाम पक्का भएको छ। सुनसरीको क्षेत्र नम्बर २ र ३ को हकमा जगदीश कुसियातको नाम चर्चामा रहे पनि एउटा क्षेत्र अध्यक्षले नै टुङ्गाउने गरी व्यवस्थापन गर्न खोजिएको देखिन्छ। १ का उम्मेद्वार पन्दाक नयाँ अनुहार हुन् । ४ कि उम्मेदवार चाैधरी भने यसअघि ३ बाट विजयी बनेकी थिईन् । ३ नं. क्षेत्रमा काङ्ग्रेसका नेता विजय गच्छदार चुनाव लड्ने तयारीमा छन् भने ४ मन काङ्ग्रेसबाट ज्ञानेन्द्र कार्की चुनाव लड्नेछन् ।

पहाडी तथा हिमाली जिल्लाहरूमा एमालेले पुराना र ‘हेभीवेट’ नेताहरूलाई नै दोहोर्‍याउने रणनीति लिएको छ। भोजपुरबाट कोशी प्रदेशका संस्थापक मुख्यमन्त्री शेरधन राई, धनकुटाबाट प्रभावशाली नेता राजेन्द्र राई र तेह्रथुमबाट पूर्वमन्त्री भानुभक्त ढकाललाई टिकट दिईएकाे छ । राईद्वयकाे यसअघि कै क्षेत्र हाे भने ढकाल यसअघि माेरङ ३ बाट लड्दै आएका थिए । गएकाे निर्वाचनमा काङ्ग्रेसका सुनिल शर्मासँग पराजित बनेपछि उनी तेह्रथुम सिफ्ट भएका हुन् ।

इलामको दुई क्षेत्रमा क्रमशः काजिमान कागते र युवा नेता सुहाङ नेम्वाङलाई अघि सारिएको छ। स्व सुवास नेम्वाङका छाेरा नेम्वाङ यसअघि पनि साेही निर्वाचन क्षेत्रबाट निर्वाचित भएका थिए। कागते भने यसअघि सूर्याेदय नगरपालिकाकाे प्रमुखमा पराजित भएका थिए ।

त्यस्तै पाँचथरमा ऐन्द्रसुन्दर नेम्वाङ, संखुवासभामा डा. अर्जुन कार्की र खोटाङमा देवविक्रम राईको नाम सूचीमा छ। संखुवासभाबाट राजेन्द्र गाैतम र तुलसीप्रसाद न्याैपानेकाे चर्चा थियाे भने खाेटाङमा विशाल भट्टराईले चुनाव लड्दै आएका थिए । उदयपुर जिल्लामा दुर्गा थापा स्वोती र अमर रायमाझीले टिकट पाउने भएका छन्। यी सबै नयाँ अनुहार हुन् ।

एमालेले कोशी प्रदेशमा महिला उम्मेदवारहरूलाई पनि प्रत्यक्ष तर्फको जिम्मेवारी सुम्पेको छ। सुनसरीमा भगवती चौधरी र उदयपुरमा दुर्गा थापा स्वोती बाहेक सोलुखुम्बुमा कल्पना राई र ओखलढुंगामा अस्मिता थापालाई उम्मेदवार बनाउने निर्णय भएको छ। उनीहरू पनि नयाँ हुन् । यसपटक साेलुखुम्बुमा मानवीर राई र ओखलढुंगामा यज्ञराज सुनुवारकाे नाम काटिएकाे छ । यसअघि ती जिल्लाबाट उनीहरू नै निर्वाचित भएका थिए ।

ताप्लेजुङको उम्मेदवार छान्ने जिम्मा भने अध्यक्ष ओलीलाई नै दिइएको छ। यसअघि साे क्षेत्रबाट एमाले उपमहासचिव याेगेश भट्टराईले निर्वाचन जित्दै आएका थिए । ताप्लेजुङबाट भट्टराईसहित क्षितिज थेबे र प्रदेश सांसद तिलकुमार मेन्याङ्बाेकाे नाम सिफारिस भएकाे थियाे ।