ताप्लेजुङ । कोशी प्रदेश सरकारले भौतिक पूर्वाधार विकास मन्त्रालय अन्तर्गत ताप्लेजुङमा पूर्वाधार विकास कार्यालय स्थापना गरेको छ ।
भौतिक पूर्वाधार मन्त्री भूपेन्द्र राईले सदरमुकाम फुङलिङको हुलाक लाइनमा एउटा घर भाडामा लिएर स्थापनान भएको कार्यालय उद्घाटन गरेका हुन् ।
यस अघिसम्म पाँचथर कार्यालयले ताप्लेजुङसमेत हेर्दै आएको थियो । कार्यालय स्थापनासँगै प्रदेश भौतिक मन्त्रालय अन्तर्गत सञ्चालन हुने सडक, मोटरेबल पुल, भवनलगायतका कार्यक्रमका लागि ताप्लेजुङका सेवाग्राहीले अब पाँचथर धाउनुपर्ने बाध्यता हटेको छ ।
संघीय संरचनापछि पनि जनताले असुविधाको महसुस नगरुन् भनेर जिल्ला जिल्लामा कार्यालय स्थापना भइरहेको मन्त्री राईले बताए । यसै आर्थिक वर्षदेखि नै जनताको सेवा जिल्लाबाटै गर्ने उद्देश्यले आर्थिक वर्षको सुरुमै कार्यालय स्थापना गरिएको मन्त्री राईले बताए ।
ठूला योजनाको ठेक्का, साना योजनाको सम्झौता अब जिल्लाबाटै हुनेछ । उद्घाटन कार्यक्रममा कोशी प्रदेशका उद्योग कृषि तथा सहकारी मन्त्री खगेन सिं हाङ्गाम, सांसद निर्मला तावा लगायतको उपस्थिति रहेको थियो ।
सो अवसरमा मन्त्री राईले प्रदेश सरकारको बजेटबाट निर्माण भइरहेका जिल्ला अस्पताल भवन लगायतको अनुगमन गरेका थिए ।
