विराटनगर । दमक नगरपालिका–३ मा निर्माणाधीन १८ तले भ्यु टावर परियोजनामा सार्वजनिक जग्गा अनियमित रूपमा निजी कम्पनीलाई दिइएको आरोपसहित अख्तियार दुरुपयोग अनुसन्धान आयोगमा उजुरी परेको छ।
दमक–५ निवासी स्थानीय नागरिक अबिन मेयाङ्ग्वोले अख्तियार कार्यालय टंगाल, काठमाडौंमा उजुरी दर्ता गराउँदै तत्काल छानबिनको माग गरेका हुन्।
उजुरी अनुसार, ‘माँ पञ्चकन्या हाउजिङ प्रा.लि.’ नामक निजी कम्पनीलाई वि.सं. २०७३ सालतिर सार्वजनिक प्रयोजनको नाममा करिब चार विघा १८ कट्ठा ७ धुर जग्गा दमक नगरपालिकाबाट उपलब्ध गराइएको थियो। उक्त जग्गा भ्यु टावर निर्माणका लागि दिइएको भए तापनि पछिल्लो समयमा कम्पनीले सोही जग्गामध्ये दुई विघा “सापटी” लिएको भन्दै फिर्ता माग गरेको र बाँकी २५ कट्ठा जग्गा वापत मौद्रिक क्षतिपूर्तिको दाबी गरिरहेको मेयाङ्ग्वोको आरोप छ।
उनले उजुरीमा भनेका छन्, “उक्त जग्गा कुनै औपचारिक प्रस्ताव, प्रक्रिया वा स्वीकृत मापदण्ड बिना निजी कम्पनीलाई दिइएको देखिन्छ। हाल उक्त कम्पनीले प्लटिङ गरी व्यावसायिक प्रयोजनमा बेच्ने प्रयास गर्दै नगरपालिकामाथि बजार मूल्यमा क्षतिपूर्ति दिन दबाब दिइरहेको छ।”
मेयाङ्ग्वोले नगरपालिका र कम्पनीबीचको कुनै आधिकारिक सम्झौता भेटिएको दाबी पनि गरेका छैनन्। तर कम्पनीले २०७५ सालमा मौद्रिक सम्झौता भएको दाबी गर्दै धम्कीपूर्ण रूपमा स्वामित्वको दाबी गरिरहेको उल्लेख गरिएको छ।
उक्त कार्य सार्वजनिक सम्पत्तिको दुरुपयोग भएको भन्दै उनले अख्तियारसँग तत्काल कागजातहरू संकलन गरी छानबिन थाल्न माग गरेका छन्। साथै, नगरपालिकाका तत्कालीन तथा हालका पदाधिकारीहरू बीच कुनै मिलेमतो भएको हो कि भन्ने आशङ्कामा समेत छानबिन आवश्यक रहेको उनले स्पष्ट पारेका छन्।
“सार्वजनिक हित विपरीत कार्य गर्ने व्यक्ति वा संस्था उपर भ्रष्टाचार निवारण ऐन २०५९ अनुसार कारबाही गरिनुपर्छ,” मेयाङ्ग्वोले निवेदनमा उल्लेख गरेका छन्।
उक्त उजुरी अख्तियारले दर्ता नम्बर C082010 मा दर्ता गरेको छ। अब यो प्रकरणमा आयोगले के निर्णय लिन्छ भन्नेमा स्थानीयबासीको चासो बढेको छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।