विराटनगर । भोजपुरको सदरमुकाममा बिहीबार विहान नेकपा एमाले अध्यक्ष केपी शर्मा ओलीलाई पहिचान पक्षधरले कालो झण्डा देखाएका छन् ।
कोशी नामको विरुद्ध आन्दोलनरत पहिचान पक्षधरले नेकपा एमालेको संकल्प यात्रामा बुधबार भोजपुर पुगेका अध्यक्ष ओलीसहितको टोली त्यहि बास बसेको थियो । बिहार उठेर धनकुटातर्फ लाग्ने क्रममा पहिचनवादीले नारावाजी गर्दै कालो झण्डा देखाएका हुन् ।
पहिचान पक्षधरहरुले एमाले पार्टी कार्यालय अगाडि विरोध प्रदर्शनसमेत गरेका छन् । कालो झण्डा देखाउने पहिचान पक्षधर नेता कार्यकर्तालाई प्रहरीले पक्राउ गरेको जनता समाजवाद नेपालका सदस्य तथा लिम्बूवान राष्ट्रिय समितिका अध्यक्ष खगेन्द्र माखिमले जानकारी दिए ।
उनका अनुसार पक्राउ पर्नेमा जसपा भोजपुरका जिल्ला उपाध्यक्ष मञ्जु राई, जिल्ला सदस्य दिनेश राई, धिरज राई, मणी राई, विद्यार्थी नेता धिरेन खिम्बू, तयाबङु राई र विकास रहेका छन् । एमालेको टोली आज धनकुटा हुँदै तेह्रथुम पुग्ने कार्यक्रम छ ।
