विराटनगर । विगत केही दिनयता बढ्दो क्रममा रहेको कोभिड १९ को संक्रमण दरलाई मध्यनजर गरी उद्योग संगठन मोरङले आजदेखि विराटनगरमा मास्क लगाऔं, कोरोना भगाऔं अभियान सुरु गरेको छ ।
संस्थागत सामाजिक उत्तरदायित्व बहन गर्दै विराटनगरको ट्राफिक चोकबाट प्रारम्भ गरिएको मास्क वितरण अभियान विराटनगरको विभिन्न भीड हुने स्थानमा सात दिनसम्म चलाईने छ । यस अभियान अन्तर्गत मास्क नलगाई हिंड्ने मानिसहरुलाई निःशुल्क मास्क प्रदान गरी मास्क लगाउन अभिप्रेरित गरिएको छ ।
कोभिड १९ को बढ्दो संक्रमणले आममानिसको जनजिवनलाई प्रभावित पार्नुका साथै अस्पतालहरुमा समेत संक्रमितको संख्या वृद्धि भई विरामीको चाप बढ्ने क्रममा रहेको अवस्थामा संक्रमण फैलिन रोक्ने अचुक विकल्पको रूपमा रहेको मास्कको प्रयोग आममानिसलाई प्रेरित गर्ने संगठनले विश्वास लिएको छ ।
