विराटनगर । प्रधानमन्त्री केपी शर्मा ओली आज झापा र मोरङका दुई छुट्टा छुट्टै कार्यक्रममा सहभागी हुन आउने भएका छन् ।
आईतवारमात्र झापाको दमक, कमल र गौरादह नगरपालिकाका पाँच वटा कार्यक्रममा सहभागी भएर काठमाण्डौ फर्किएका प्रधानमन्त्री ओली फेरि झापा आउन लागेका हुन् ।
प्रधानमन्त्री ओली फागुन २१ गते पनि झापा आउने कार्यक्रम रहेको नेकपा ओली समूह झापाका अध्यक्ष चिन्तन पाठकले बताए । गृह जिल्ला झापाका दुई कार्यक्रम र मोरङको एक कार्यक्रममा सहभागी भई प्रधानमन्त्री ओली आजै साँझ काठमाडौं फर्किने छन् ।
प्रधानमन्त्री एवम् नेकपाका अध्यक्ष ओली काठमाडौंबाट यति एयरलाइन्सको दोस्रो फ्लाइटबाट भद्रपुर ओर्लनेछन् । गृह जिल्लामा पहिलो कार्यक्रम विर्तामोड नगरपालिकाले वडा नं ७ मा निर्माण गरेको प्रदेश गौरभ भिलेजको समुद्घाटन गर्ने छन् । प्रदेश गौरभ भिलेज विर्तामोड नगरपालिकाले निर्माण गरेको छ । ह्याविट्याट र सहरा नेपाल नेपालको सहयोगमा ३७ वटा आवास निर्माण गरिएको छ ।
प्रत्येक घर निर्माणका लागि ४ लाख खर्च भएको नगर प्रमुख ध्रृव कुमार शिवाकोटीले जानकारी दिए । उनका अनुसार सो आवास निर्माणका लागि धनजुजु र कमला श्रेष्ठले १ विगाह ३ कठ्ठा जग्गा प्रदान गरेका थिए ।
प्रधानमन्त्री ओलीको मंगलबारको दोस्रो कार्यक्रम पूर्वाञ्चल क्यान्सर अस्पतालको समुद्घाटन रहेको छ । अस्पतालको उद्घाटन पछि अवलोकन गर्ने छन् । प्रधानमन्त्रीले सम्बोधन गर्ने कार्यक्रम छ ।
अन्तिम कार्यक्रम उर्लाबारी नगरपालिका–९ स्थित नदी किनारमा रहेको सन्थाल बस्ती निर्माणको शिलान्यास रहेको छ । झापाका दुई कार्यक्रम पश्चात प्रधानमन्त्री ओली उर्लावारी पुग्नेछन् ।
सरकारले अल्पसंख्यक र लोपोन्मुख जातिको उत्थान गरी उनीहरूलाई व्यवस्थित र एकीकृत बस्तीमा बसाउने कार्यक्रमअन्तर्गत मोरङको उर्लाबारीमा सन्थाल बस्ती निर्माण योजना अगाडि बढाएको छ । सो वस्तीको शिलान्यास पछि ओली विराटनगर हुँदै आजै काठमाडौं फर्किने कार्यक्रम तय भएको छ ।
