काठमाडौँ । नुवाकोटको शिवपुरीमा हेलिकप्टर दुर्घटना भएको छ ।
बुधबार काठमाडौँबाट रसुवाका लागि उडेको एयर डाइनेस्टीको हेलिकप्टर दुर्घटना हुँदा पाइलटसहित पाँच जनाको मृत्यु भएको बताइएको छ ।
शिवपुरी गाउँपालिका वडा नम्बर ७ स्थित सूर्यचौर क्षेत्रमा हेलिकप्टर खसेको हो । हेलिकप्टर खसेको र आगो लागेको जानकारी आएपछि प्रहरी घटनास्थलतर्फ गएको जिल्ला प्रहरी कार्यालय नुवाकोटले जनाएको छ । घटनास्थलबाट पाँच जनाको शव निकालेको जिल्ला प्रहरी कार्यालय नुवाकोटका डिएसपी तिलक भारतीले जानकारी दिए ।
हेलिकप्टर दुर्घटनामा क्याप्टेन अरुण मल्ल र चार चिनियाँ नागरिकको मृत्यु भएको हो । स्याफ्रुबेसी गएको दर्ता नम्बर एन–एजेडी हेलिकप्टर दुर्घटनामा परेको हो ।
नुवाकोटको शिवपुरी गाउँपालिका १ स्थित गुर्जेमा भएको दुर्घटनामा ४ जनाको शव फेला परेको प्रहरीले जनाएको छ । घटनास्थलमा प्रहरी पुगेर उद्धार कार्य सुरु भइसकेको छ ।
त्रिभुवन विमानस्थल स्रोतका अनुसार हेलिकप्टर १ बजेर ५४ मिनेटमा काठमाडौंबाट उडेको थियो । त्रिभुवन अन्तर्राष्ट्रिय विमानस्थलका अनुसार सो हेलिकप्टर क्याप्टेन अरुण मल्लले उडाइरहेका थिए ।
