विराटनगर । सप्तरीको शम्भुनाथमा एक जना महिलाको हात्ती आक्रमणबाट मृत्यु भएको छ ।
शम्भुनाथ नगरपालिका २ की ३८ वर्षीया जानकी मगरको हात्तीको आक्रमणबाट मृत्यु भएको हो ।
घरमा हात्ती प्रवेश गरेपछि श्रीमान पेशलसँगै भाग्ने क्रममा हात्तीले आक्रमण गरेको थियो । हात्ती आक्रमणबाट गम्भीर घाइते भएकी उनलाई उपचारका लागि राजविराजस्थित गजेन्द्रनारायण सिंह अस्पताल लैजाने क्रममा बाटोमै मृत्यु भएको हो ।
मध्यराति वनक्षेत्रबाट आएका तीनवटा हात्तीले घर भत्काउँदै मगरमाथि आक्रमण गरेका थिए । उनको शरीरका विभिन्न भागमा चोट लागेको थियो । उनको शव पोस्टमार्टमका लागि गजेन्द्रनारायण सिंह अस्पताल राजविराजमै राखिएको छ ।
हात्तीले जानकीसहित अन्य दुई जनाको घरसमेत भत्काइदिएको छ । हात्तीले लक्ष्मण मण्डल र बलराम ईसरको घर भत्काइदिएको प्रहरीले जनाएको छ ।
