विराटनगर । आगामी वैशाख १५ गतेका लागि तोकिएको इलाम निर्वाचन क्षेत्र नम्बर २ को उपनिर्वाचनमा पहिचानवादीको तर्फबाट डकेन्द्रसिंह थेगिम उम्मेद्वार बन्ने पक्का पक्की भएको छ ।
थेगिम प्रदेश १ पुनः नामकरण संघर्ष समितिका संयोजक पनि हुन् । पहिचानको आन्दोलनम नेतृत्व गरिरहेका नेता गोपाल किरातीले सामाजिक सञ्जाल फेसबुकमा स्टाटस लेख्दै थेगिमलाई उम्मेद्वार बनाउने सार्वजनिक गरेका हुन् । ‘इलाम–२ उपनिर्वाचनका लागि प्रदेश १ पुनः नामाङ्कन संघर्ष समितिको (पहिचानवादी) साझा उमेदवारका रुपमा श्री डकेन्द्रसिं थेगिमको नाम निश्चित भएको छ,’ किराँतीले लेखेका छन् ।
थेगिमले पनि आफू त्यस क्षेत्रबाट उम्मेद्वार बन्ने निश्चित भएजस्तै रहेको बताए । ‘औपचारिक घोषणा गर्न बाँकी छ । तर, फाइनल जत्तिकै हो,’ थेगिमले भने, ‘अब नेताहरुले पनि सार्वजनिक हिसाबले भनिसकेपछि त्यस्तै देखिन्छ ।’ गत फागुन २१ गते काठमाडौंस्थित आदिवासी जनजाति महासंघको कार्यालयमा बसेको बैठकले यस्तो सहमति गरेको उनले बताए ।
आन्दोलनरत पक्षका प्रमुख घटकहरुले आफूलाई समर्थन गरेको उनले बताए । यसअघि संघीय लोकतान्त्रिक राष्ट्रिय मञ्चका अध्यक्ष कुमार लिङ्देन, किरात याक्थुङ चुम्लुङका अध्यक्ष प्रेम येक्तेन, जनमुक्ति पार्टीका अध्यक्ष केबी पालुङ्वा र संघर्ष समितिका संयोजक समेत रहेका संघर्ष समितिका संयोजक थेगिम उम्मेद्वार बन्ने चर्चा थियो ।
प्रदेशको नाम कोशी राखेपछि पहिचानवादी संघसंस्थाहरु किरात याक्थुङ चुम्लुङ, नेपाल आदिवासी जनजाति महासंघ, किरात राई यायोक्खा र नेपाल शेर्पा संघसमेतको सहभागितामा थेगिमको नेतृत्वमा प्रदेश १ पुनः नामकरण संघर्ष समिति गठन भएको थियो । आफू उम्मेदवार भएसँगै पहिचान पक्षधर पार्टीहरुसँग पनि सहकार्य हुने विश्वास उनले व्यक्त गरे ।
‘पहिचान पक्षधरका पार्टी जसपा, माओवादी पार्टीका साथीहरुले पनि सघाउने भन्नुभएको छ । त्यसो हुँदा राम्ररी सल्लाह गरौं भनेका छौं,’ थेगिमले भने, ‘तर, अब पार्टीहरुको कस्तो खालको गठबन्धन बन्छ । त्यहाँ गठबन्धन बनेर ह्वीप जारी नै भयो भने त अप्ठ्यारो अवस्था होला । नत्र हामी सहकार्य गरेर अगाडि बढ्छौं ।’
संविधानसभाका अध्यक्ष सुवासचन्द्र नेम्वाङको गत भदौ २६ गते मृत्यु भएपछि खाली रहेको सो निर्वाचन क्षेत्रमा आगामी वैशाख १५ गते निर्वाचनको मिति तोकिएको छ । उक्त निर्वाचनमा एमालेले उनै नेम्वाङका छोरा सुहाङ नेम्वाङलाई उठाउने चर्चा छ । उता, काँग्रेसले भने यसअघि नेम्वाङसँगै पराजित बनेका डम्बर बहादुर खड्कालाई नै उम्मेदवार बनाउने सम्भावना बढि रहेको बताइएको छ ।
नयाँ पार्टीको रुपमा उदाएको राष्ट्रिय स्वतन्त्र पार्टी (रास्वपा)ले पनि ६ जनाको नाम सर्ट लिष्टमा राखेको जनाएको छ । यद्यपि उनीहरुको नाम गोप्य राखेको छ । माओवादी केन्द्रले पनि यसपटक एक्लै चुनावी मैदानमा उत्रने जनाएको छ ।
२०७९ को निर्वाचनमा काँग्रेस इलामका सभापतिसमेत रहेका खड्का नेम्वाङसँग थोरै मतले हारेका थिए । त्यसबेला नेम्वाङले ३० हजार २० मत ल्याएर विजयी भए भने खड्काले २९ हजार ९०६ मत ल्याए । काँग्रेसका उम्मेदवार खड्काले २०७९ सालमा माओवादी, नेकपा (एकीकृत समाजवादी)सँग गठबन्धन गरेका थिए । यसपटक केन्द्रमा गठबन्धन फेरबदल भएसँगै इलामको निर्वाचनमा कुन कुन पार्टीबीच सहकार्य होला वा एक्ला एक्लै लड्लान् भन्ने विषय स्पष्ट भने भइसकेको छैन ।
