विराटनगर । राष्ट्रिय डोरी तान प्रतियोगिता विराटनगरमा हुने भएको छ । पहिलो पटक कोशी प्रदेशमा डोरी तानको राष्ट्रिय प्रतियोगिता हुन लागेको हो ।
नेपाल डोरी तान संघ र कोसी प्रदेश डोरी तान संघको आयोजनामा प्रतियोगिता हुन लागेको हो ।यही फागुन १८ र १९ गते प्रतियोगिता आयोजना हुने संघकी कोशी प्रदेश अध्यक्ष रिता न्यौपानेले जानकारी गराइन् ।
विराटनगरको महेन्द्र मोरङ आदर्श बहुमुखी क्याम्पसको खेल मैदानमा हुने प्रतियोगिताको उद्घाटन कोशी प्रदेशका सामाजिक विकास मन्त्री राजेन्द्रकुमार कार्कीले गर्ने पत्रकार सम्मेलनमा जानकारी दिइएको छ ।
प्रतियोगितामा सात प्रदेशका ७ वटा टिम तथा नेपाल प्रहरी, सशस्त्र प्रहरी र नेपाली सेनाकाको विभागीय टोली सहित १० टिमले प्रतियोगितामा सहभागिता जनाउने अध्यक्ष न्यौपानेले जानकारी दिइन् । प्रतियोगितामा विजेता टोलीलाई नगद १ लाख र उपविजेता टोलीले ५० हजार प्राप्त गर्नेछन् । राष्ट्रिय खेलकुद परिषद्का सदस्य सचिव टङ्कलाल घिसिङको उपस्थितिमा समापन कार्यक्रममा विजेतालाई नगद सहित मेडल, सिल्ड र प्रमाणपत्र प्रदान गरिने उनको भनाई छ ।
२०६४ सालमा राष्ट्रिय खेलकुद परिषदमा दर्ता भएको डोरी तान सङ्घले यो बिचमा धेरै अन्तर्राष्ट्रिय प्रतियोगिताहरू समेत जितिसकेको आयोजकको दाबी छ । आयोजक नेपाल डोरी तान सङ्घका उपाध्यक्ष सुवास पोखरेलले सङ्घले दोस्रो पटक राष्ट्रिय स्तरको प्रतियोगिता गर्न लागेको जानकारी दिए । उनका अनुसार, गत वर्ष राष्ट्रिय प्रतियोगिता काठमाडौँमा भएको थियो । प्रतियोगिताको माध्यमाबाट यो खेललाई प्रवर्द्धन गर्दै देश भरी नै पु¥याउने गरी अहिले सङ्घले काम गरिरहेको बताए। अहिले ४४ जिल्लामा सङ्घ बनेर गतिविधिहरू भइरहेको पोखरेलको भनाई छ।
प्रतियोगिता सम्पन्न गर्नको लागि करिब १९ लाख लाग्ने आयोजकको अनुमान छ।
