जवाफी ब्याटिङमा नेपालले निकै खराब सुरुवात गर्यो । ११ रनमा ३ विकेट गुमाउँदा नेपालले आज प्रतियोगितामा पहिलो हार चाख्ने चिन्ता मडारिएकोमा ओपनर आसिफ शेख, कप्तान रोहित पौडेल र फिनिसर दिपेन्द्र सिंह ऐरीले नेपाललाई मिठो जित दिलाए ।
आसिफ आउट हुँदा नेपालले १५.३ ओभरमा ११० रन बनाएको थियो । जितका लागि नेपाललाई ३३ बलमा ५५ रन चाहिएको थियो । अनि क्रिजमा आए दिपेन्द्र । पहिलो बलमै छक्का हानेर उनले आफ्नो नियत स्पष्ट गरे । त्यसपछि पनि उनी रोकिएनन् । नेपालविरुद्ध पहिलो जित निकाल्ने आशामा रहेको दीपेन्द्रको आक्रमणमा स्तब्ध बन्यो ।
अर्को इन्डमा कप्तान रोहितले फेरि एकपटक महत्वपूर्ण पारी खेले । अत्यन्तै सुझबुझपूर्ण ब्याटिङ गरेका उनले आसिफ र दीपेन्द्रसँग गरेको साझेदारी नै आज नेपालको जितको आधार बन्यो । रोहित अर्धसतक बनाउन भने चुके । उनले ४२ बलमा १ छक्का र ४ चौकाको मद्दतमा ४७ रन बनाए ।
विष्फोटक इनिङ खेलेका दीपेन्द्र भने अविजित रहे । उनले उनले १५ बलमा १ छक्का र छ चौका सहित ४० रन जोडे ।
यसअघि यूएईले बासिर अहमदको आक्रामक ब्याटिङको मद्दतमा १६४ रनको स्कोर खडा गरेको थियो । खराब सुरुवात गरेको यूएईले २८ रनमा दुवै ओपनरलाई गुमाएको थियो । दुवैलाई सोमपालले आउट गरेका थिए ।
पहिलो विकेटका रुपमा खालिद साहलाई सोमपालले बोल्ड गरेर भने खतरनाक ब्याट्सम्यान मुहम्मद वसिम सोमपाललाई ठूलो प्रहार गर्ने चक्करमा गुल्सन झाबाट क्याचआउट भए ।
त्यसपछि अरविन्द र आसिफ खानबीचको साझेदारीले नेपाललाई खतराको संकेत देखाइरहेको थियो । तर, गुल्शनको बलमा विष्फोटक ब्याट्सम्यान आसिफ आउट भएपछि नेपाललाई राहत मिल्यो । आसिफले १७ बलमा १८ रन बनाए ।
चौथो विकेटका रुपमा अलिसान सराफु रन आउट भए । पाचौं विकेटका रुपमा यूएईले अरविन्दलाई गुमायो । संयमित भएर खेलिरहेका अरभिन्दले यूएईका लागि ५१ बलमा ४५ रन जोडे । उनलाई अविनाश बोहराले बोल्ड गरेका थिए ।
यूएईका लागि बासिर अहमदले विष्फोटक पारी खेले । उनले १९ बलमा ५ छक्का र दुई चौकाको मद्दतमा ४५ रन जोडेपिछ यूएई ठूलो स्कोरतर्फ लम्किएको थियो । बसिललाई अविनाशको बलमा नेपालका कप्तान रोहित शर्माले लङ अनमा सनसनीपूर्ण क्याच लिएर आउट गरे । सातौं विकेटका रुपमा अलि नासर करण केसीको बलमा आउट भए । केसीले आज महंगो बलिङ गरेका छन् ।
उनले ४ ओभरमा ५३ रन खर्चिएर एक विकेट मात्र लिएका छन् । अन्तिम बलमा उनलाई अर्को विकेटको मौका थियो, तर नेपालले क्याच ड्रप गर्यो । नेपालका फास्ट बलर सोमपाल कामी र अविनाश बोहराले दुई दुई विकेट लिए । गुशल्न झा र करण केसीको भागमा एक–एक विकेट रह्यो ।
नेपालले यस सिरिजमा लगातार चार जित हात पारिसकेको छ। हङकङलाई दुई पटक र युएईलाई दुई पटक पराजित गरिसकेको छ।
चार जित हात पारेसँगै नेपालले शुक्रबार हुने कीर्तिपुर क्रिकेट मैदानमा फाइनल खेल्नेछ।
त्यसअघि बुधबार युएई र हङकङबीच मुलपानीमा खेल हुनेछ। आइतबार युएईले हङकङलाई ६ विकेटले पराजित गरेको थियो।
