विराटनगर । विराटनगरस्थित ग्रिनक्रस हस्पिटलबाट नवजात शिशु बेचिएको आरोपमा पक्राउ परेका भोजपुर हतुवागढी गाउँपालिका–४ घर भएका २७ वर्षीय गोविन्द राई नाता भित्रकै युवतीसँग दुई वर्षदेखि प्रेममा परेका थिए ।
मायामा परेपछि गोविन्दको २६ वर्षीया फुलकुमारी ( नाम परिवर्तन ) सँग नजिकिए । उनीहरूबीच विवाह गर्ने सल्लाह भएपछि शारिरिक सम्पर्क भयो र फुलकुमारी गर्भवती भइन् । त्यो गर्भमा भएको बच्चाले गोविन्द असजिलोमा परेका थिए । उनले प्रेमिका भनिएकी युवतीलाई आठ महिनासम्म सन्तानलाई जन्म दिएर विवाह गर्ने बाचा कसिरहे । तर, गर्भमा शिशु हुर्कदैं जाँदा त्यसको व्यवस्थापन गरेर युवतीसँगको प्रेम तोड्ने मनस्थितिमा उनी थिए ।
दुई जनाबीचको सम्बन्धबाट गर्भ बसेपछि गोविन्दले प्रेमिकालाई विराटनगर लिएर असार १३ गते आएका थिए । सुरुमा ग्रीनक्रस अस्पताल नजिकै रहेको दीपेश मेडिकल क्लिनिकमा लिएर आए । उक्त क्लिनिक स्त्री तथा प्रसुती रोग विशेषज्ञ डाक्टर तपेश्वरलाल कर्णको हो । क्लिनिकमा आएका बिरामी भर्ना गर्नुपर्दा उनले ग्रीनक्रस अस्पतालमा लगेर उपचार गर्दै आएका छन् ।
उनको क्लिनिकबाट ग्रीनक्रस ५० मिटर पश्चिममा रहेको छ । कर्णले ती किशोरीका प्रेमीसँग ३५ हजार रुपैयाँ लिएर प्रसूति ग्रिनक्रसमा गराए । उनीहरूबाट जन्मिएको शिशुको व्यवस्थापन गर्ने जिम्मा पनि कर्णले लिए । किशोरीलाई वास्तविक परिचय लुकाएर अस्पताल भर्ना गरेको पाइएको छ । अस्पतालको रेकर्डमा गोविन्दको नाम मानबहादुर तामाङ र युवतीको फूलकुमारी तामाङ तथा ठेगाना सुनसरीको रामधुनी–११ उल्लेख छ । व्यथा लाग्ने औषधी खुवाएर प्रसूति गराएपछि युवतीलाई अस्पतालले १४ असार दिउँसो डिस्चार्ज दिएको अस्पतालको रेकर्डमा देखिन्छ ।
अस्पतालमा नर्मल डेलिभरी मार्फत फुलकुमारीले छोरी जन्माइन् । रुँदै जन्मिएकी छोरीलाई हेरेपछि नर्सले लिएर गए । पछि उनले छोरी पाइनन् । सोही दिन अस्पतालले डिस्चार्ज दिएको भन्दै उनलाई प्रेमीले लिएर इटहरी तर्फ लागे । इटहरीमा लगेर उनले होटलमा राखे । बच्चा खोज्दा गोबिन्दले अस्पतालमा उपचार हुँदैछ भन्ने जवाफ दिए । होटलमा पुगेको २ दिनपछि अस्पताल जान्छु भन्दै हिँडेका राई फर्किएनन् । होटलमा अलपत्र परेकी सुत्केरी युवतीलाई आफन्त मार्फत सोनापुरमा डेरा खोजेर बसिन् ।
आफूले जन्माएको छोरी र प्रेमी गायब भएपछि उनी साउन ३२ गते प्रहरी कार्यालय मोरङ पुगेकी थिइन् । उनले जाहेरी दिएपछि प्रहरी अनुसन्धान सुरु गरेर यस घटनामा ६ जनालाई पक्राउ गरेको छ ।
यसैबीच नवजात शिशु बेचेको आरोपमा पक्राउ परेका डाक्टर तपेश्वरलाल कर्णसहित ६ जनालाई प्रहरीले तीन वटा मुद्दा चलाउने तयारी अनुसार अनुसन्धान अघि बढाएको छ ।
पक्राउ परेका कोशी अस्पतालका पूर्व मेसु स्त्री तथा प्रसूती रोग विशेषज्ञ ६८ वर्षीय डाक्टर कर्णसहित ६ जनालाई प्रहरीले तीन वटा मुद्दा चलाउने भएको हो । पक्राउ परेका ६ जनालाई प्रहरीले संगठित अपराध, मानव बेचबिखन तथा ओसार पोसार र ‘व्यक्ति बेपत्ता पारेको कसुरमा’ मुद्दा चलाउने तयारीका साथ प्रहरीले अनुसन्धान प्रक्रिया अघि बढाएको छ ।
सरकारी वकिलसँग राय लिएर अनुसन्धान प्रक्रिया अगाडि बढाएको मोरङ प्रहरी प्रमुख एसपी दीपक पोखरेलले बताए । ‘कुन ऐन आकर्षित हुन्छ । हामी सबै तिरबाट फराकिलो बनाएर अनुसन्धान र प्रमाण (दसी) जुटाउने काम लागेका छौं,’ एसपी पोखरेलले भने, ‘अनुसन्धान पूरा गरेपछि सरकारी वकिलको कार्यालयमा प्रतिवेदन बुझाएपछि जिल्ला सरकारी वकिलको कार्यालयले अभियोजन तयार गरी अदालतमा मुद्दा दायर गर्नेछौं ।’
प्रहरीले यस घटनामा मंगलबार थप चार जनालाई पक्राउ गरेको थियो । पक्राउ पर्नेमा नवजात शिशु खरिद गर्ने, हस्पिटलका सरसफाइकर्मी, पाँच लाखमा शिशु बेच्ने डाक्टर तपेश्वरलाल कर्णका सहयोगी नर्सलाई प्रहरीले पक्राउ गरेको हो । पक्राउ पर्नेमा ग्रिनक्रस अस्पतालमा कार्यरत ३३ वर्षीया सरसफाइकर्मी सुधा राजवंशी, कटहरी गाउँपालिका २ की ४६ वर्षीया दिलमाया राजबंशी, ३० वर्षीय सुर्यनारायण राजवंशी, सिराहाको कल्याणपुर नगरपालिका १२ की ३८ वर्षीया नर्स निर्मला यादव रहेको मोरङ प्रहरीका प्रवक्ता डिएसपी रन्जन कुमार दाहालले जानकारी दिए ।
पक्राउ पर्ने मध्ये डा. कर्णसँग उक्त शिशु खरिद गर्ने दिलमाया र उनका छोरा सूर्यनारायण, दिदी सुधा राजवंशी र चिकत्सकका सहयोगी निर्मला लाई प्रहरीले अनुसन्धानका लागि नियन्त्रणमा लिएको हो । डा. कर्णले ग्रिनक्रस अस्पतालको ओटी विभागमा कार्यरत सुधा मार्फत उक्त शिशुलाई बिक्री गरेको खुलेको छ । शिशु खरिद गर्ने निस्सन्तान राजवंशी दम्पती सुधाका नातेदार रहेको पाइएको छ ।
कर्णले पाँच लाख लिएर बेचेको प्रहरीको अनुसन्धानबाट खुलेको छ । विवाह भएको एक दशक वितिसक्दा पनि दिमायाको छोरा –बुहारीको सन्तान नभएकोले शिशु खरिद गरेको उनले स्वीकार गरेको प्रहरीले जनाएको छ ।
