विराटनगर । नेपाल अग्रवाल युवा मञ्च विराटनगरको आयोजनामा शनिबार सम्पन्न नवौं संस्करणको मारवाडी प्रिमियर लिग(एमपिएल) क्रिकेट प्रतियोगिता उपाधि प्रिमियर–११ ले जितेको छ ।
आज भएको फाइनल खेलमा खेल सकिन लाग्दा समान्य विवाद भएपछि हुलास–११ ले खेल अस्वीकार गरेपछि म्याच रेफ्री मांगिलाल शर्माले प्रिमियरलाई विजयी घोषणा गरे । नवौं संस्करणको एमपिएल जितेको प्रिमियरले लगातार ३ सिजन उपाधि रक्षा गर्दै ह्याट्रिकसहित चौथोपटक उपाधि जितेको हो ।
जवाफमा ८६ रनको सामान्य लक्ष्य पाएको लिगमा अपराजित प्रिमियरले ८ दशमलव ३ बलमा ३ विकेटको नोक्सनी मा ५४ रन बनाएपछि खेलमा विवाद भएको थियो । विवादले खेल नभएपछि खेल प्रिमियरले जितेको हो । प्रिमियरका लागि म्यान अफ द फाइनल हरिया बाहेतीले अविजित ५५ रन बनाउँदा अमित अटलले ११ रन बनाए । हुलासका विवेक दुगड, शुभम लुनिया र मनिष कोठारीले १–१ विकेट लिए ।
यसअघि टस हारेकोे हुलास–११ निर्धारित १२ ओभरमा ७ विकेट गुमाई ८५ बनायो । हुलासका दर्शन दुगडले ३५ रन बनाउँदा अरिन्त वैद्यले १३ रन र अरियन्त दुगडले अविजित १० रनको योगदान दिए । प्रिमियरका गौरव राठीले ४ विकेट लिँदा मोहित अटल र वेदान्त जाजुले १–१ विकेट दिए ।
प्रतियोगितको उत्कृष्ट खेलाडी म्याजिकका अनिष अग्रवाल घोषित भए । त्यस्तै उत्कृष्ट ब्याट्सम्यान प्रिमियरका अमित अटल हुँदा उत्कृष्ट बलर प्रिमियरकै वेदान्त जाजु भए । ओरेन्ज क्याप प्रिमियरका अनिल अटल तथा पर्पल क्याप प्रिमियरका वेदान्त जाजु भए । त्यसैगरी फेयर प्ले अवार्ड सिएसवि–११ ले हात पार्दा उदयमान खेलाडी पर्शुरामका कसलदिप गौर भए ।
विजयी तथा अन्य खेलाडीलाई प्रमसख अतिथि पूर्वराज्य मन्त्री मोती दुगड, नेपाल अग्रवाल सभाका अध्यक्ष विशाल केडिया, महेश्वरी सभाका अध्यक्ष आन्न्द मारु, जैन स्वेताम्वर तेरापन्थी सभाका अध्यक्ष सुतिस दुगड, एमपिएल–९ का अध्यक्ष अभिषेक केडिया र खेल सम्योजक हेमन्त अग्रवालले पुरस्कार तथा ट्रफि वितरण गरे । फागुन ११ गतेदेखि शुरु भएको प्रतियोगिता लिगकम नकआउटको आधारमा खेलाएको थियो ।
मारवाडी समुदायबीच खेलाइने प्रतियोगितामा नेपाल अग्रवाल युवा मञ्च, मेहेश्वरी युवा मञ्च, ओस्वाल युवा मञ्च, नेपाल मारवाडी ब्राहण युवा मञ्च र मेढ स्वर्णकार युवा मञ्चका क्रमशः म्याजिक स्टाइकर्स, प्रिमियर–११, हुलास–११, पर्शुराम वारियर्स र सिएसवि–११ सहभागी थिए । विजेताले ६१ हजार तथा ट्रफ्री र उपविजेताले २१ हजार तथा ट्रफ्री हात हात पारेको थियो ।
