यसरी भेटिन्छ हराएको मोबाइल

विराटनगर । विराटनगर–३ की अनिता निरौला किराना पसलको व्यापार गर्नुहुन्छ । उहाँको घरमै रहेको किराना पसलमा चार्जमा लगाएको मोवाइल एक महिना अगाडि चोरी भयो । विदेशबाट श्रीमानले पठाइदिएको सामसुङ कम्पनीको मोवाइलसहित झोलामा राखिएको ६ हजार रूपैयाँमा पनि चोरी भएको थियो ।

मोवाइल हराएपछि तत्काल निरौलाले जिल्ला प्रहरी कार्यालय मोरङमा मोवाइल खोजी गरिदिन आग्रह गर्दै निवेदन दर्ता गराउनुभयो । प्रहरी कार्यालयमा निवेदन दर्ता भएको एक महिनापछि उहाँको मोवाइल फेला परेको भन्दै प्रहरीले लिन बोलायो ।

‘तपाईंको हराएको मोबाइल फेला प¥यो, लिन आउनु होला’ एक महिनापछि मोरङ प्रहरी कार्यालयबाट अनितालाई फोन गयो । ‘म त छक्क परे चोरी भएको मोवाइल भेटियो,’ मोवाइल लिन सोमबार मोरङ प्रहरी कार्यालयमा पुग्नुभएकी अनिताले भन्नुभयो, ‘मोबाइल हराएपनि प्रहरीको सक्रियतामा फेला भने पर्ने रहेछ । मैले त आसा मारेको मोबाइल आज पाएको छु ।’

त्यस्तै मोरङ ग्रामथान ३ की प्रमिला निरौलाको गत जेठ १८ गते मोवाइल हराएको थियो । उहाँको पनि हराएको ५ महिनापछि प्रहरीले मोबाइल भेट्टाइदिएको छ । मोवाइल लिन आउनुभएका निरौलाले भन्नुभयो, ‘मोबाइल हराएपछि भेटिएला भन्ने आस थिएन तर साथीले प्रहरीलाई निवेदन दिए फेला पर्छ भनेपछि प्रक्रिया चालेकी थिएँ । आशा मारिसकेको मोइवल भेटियो ।’

सोमबार एकैदिन हराएको ५१ थान मोवाइल खोजी गरेर सम्बन्धीत मोवाइल धनीलाई मोरङ प्रहरीले बुझाएको मोरङ प्रहरीका प्रवक्ता डिएसपी मानबहादुर राईले जानकारी दिनुभयो । आर्थिक वर्ष २०७६/७७ मा मोरङ प्रहरीमा १ हजार ३ सय ५९ वटा मोवाइल चोरी र हराएको निवेदन दर्ता भएको छ । जसमध्ये आर्थिक वर्षमा चोरी तथा हराएको १ सय ८३ वटा सम्बन्धीत धनीलाई बुझाएको मोरङ प्रहरीले जनाएको छ ।

मोवाईल चोरी तथा लुटपाटमा संलग्न चार जनालाई प्रहरीले ‘डाका’ मुद्दा अदालतमा मुद्दा दर्ता गरेको छ । प्रविधिको प्रयोग गरेर हराएका मोबाइला फेला पारेर सम्बन्धित धनीलाई नै फिर्ता गरिदिने गरेको प्रहरीले जनाएको छ । डिएसपी राईले आफ्नो समानको सुरक्षामा आफूले पनि बढी चनाखो हुनुपर्ने सुझाब दिनुभयो ।
हराएको मोवाइलको खोजी गर्न जिप्रका मोरङमा प्रहरी निरीक्षकको नेतृत्वमा टोली छ । मोबाइल हराएपछि पहिले प्रहरीकोमा निवेदन दर्ता गर्दा निवेदकले आईएमईआई कोडससमेत दिनुपर्छ । त्यो कोड र मोबाइल नम्बर प्रहरीको प्रधान कार्यालयमा पठाउँछ ।

सिडिआर भन्ने सिस्टममा त्यसलाई हालेपछि मोबाइलमा नयाँ सिम हालेर चलाए त्यसको कल डिटेल र लोकेसन प्रहरीले पत्ता लगाउँछ । ‘त्यसपछि मोबाइल चलाउने व्यक्तिलाई फोन गरेर प्रहरी कार्यालयमा आई बुझाउन भन्छौं,’ डिएसपी राईले भन्नुभयो, ‘अटेर गरे प्रहरी टोली परिचालन गरी सम्बन्धित ठाउँमै गई पक्राउ गरेर ल्याइन्छ ।’